Almaty qalasynyń kıberpolısıa qyzmetkerleri aqparattyq tehnologıalardy paıdalana otyryp jasalǵan quqyq buzýshylyqtardyń aldyn alý jáne olardyń jolyn kesý maqsatynda júrgizilip jatqan "Anti Fraud" jedel-profılaktıkalyq is-sharasy týraly eske saldy.
Jýyrda Almaty qalasynyń Almaly aýdanynda quqyq qorǵaý organdary arnaıy reıd barysynda kúdik týdyrǵan 35 jastaǵy er adamdy ustady. Ol Áıtıev kóshesindegi úılerdiń biriniń aýlasynda ruqsat etilmegen dybys jazý fýnksıasy bar USB-fleshkany satyp, zańsyz qurylǵyny áleýetti klıentke ótkizbek bolǵan, dep habarlaıdy aqshamnews.kz Polisia.kz-ke silteme jasap.
- Bul áreket zańǵa qaıshy jáne Qazaqstan Respýblıkasynyń Qylmystyq kodeksiniń 399-babymen qarastyrylǵan quqyq buzýshylyq bolyp tabylady. Osy derek boıynsha Almaly aýdandyq polısıa basqarmasy aqparatty jasyryn alý úshin arnaıy tehnıkalyq quraldardy zańsyz óndirý, daıyndaý, alý, ótkizý nemese paıdalaný faktisi boıynsha qylmystyq is qozǵady, – dep málimdedi Almaty qalalyq PD kıberqylmysqa qarsy kúres basqarmasynyń basshysy Anes Qaldybaev.
Tergeý múddesine sáıkes QR QK-niń 201-babyna saı ózge aqparat jarıalanbaıdy. Sonymen qatar, QR Konstıtýsıasynyń 77-babynyń 3-bóliminiń 1-tarmaǵyna jáne QR QK-niń 19-babynyń 1-tarmaǵyna sáıkes kez kelgen azamattyń kinási sot sheshimi zańdy kúshine engenge deıin dáleldenbegen bolyp sanalady.