Ál-Farabı atyndaǵy Qazaq ulttyq ýnıversıtetiniń 5 jas ǵalymyna QR Prezıdenti Qasym-Jomart Toqaevtyń atynan páter kilti tabys etildi, dep habarlaıdy aqshamnews.kz
QazUÝ-dyń 90 jyldyǵyna arnalǵan sharada jas zertteýshilerge páter sertıfıkatyn QR Memlekettik keńesshisi Erlan Qarın saltanatty túrde tabystady.
Atap aıtqanda aǵa oqytýshylarOljas Qurmanbaev pen Janar Raıymbekova, ǵylymı-ınnovasıalyq qyzmet jáne halyqaralyq baılanys kafedrasy meńgerýshisiniń orynbasary Nurgúl Amangeldi, molekýlalyq bıologıa jáne genetıka kafedrasynyń ǵylymı qyzmetkeri Áıgerim Qýanbaı, sondaı-aq aǵa ǵylymı qyzmetker Ajar Málik jańa páterdiń ıesi atandy.
«Qatty qýanyshtymyn. Men úshin kútpegen oqıǵa boldy. Búgin páter sertıfıkatyn qolyma alyp jatyrmyn. Aıtar alǵysym sheksiz. Qazirgi sátke deıin jaldamaly páterde turatynmyn. Endi óz úıim bar», - dedi Nurgúl Amangeldi.
Sonymen qatar páter ıesi atanǵan jas ǵalymnyń biri - Ajar Málik. Ol Ál-Farabı atyndaǵy Qazaq ulttyq ýnıversıtetinde 9 jyl bilim alyp, qazirgi sátte atalǵan oqý ordasynda tabysty jumys isteýde.
«QR Prezıdentiniń sheshimimen jas ǵalymdarǵa páter sertıfıkaty beriletinin estidim. Biraq sol tizimge enip, páter ıesi atanamyn degen oı bolǵan joq. Búgin tabystaǵanda qatty qýandym. Osy oraıda jas ǵalymdardyń eńbegin baǵalap jatqan barlyq janǵa alǵysymdy bildirgim keledi. Ata-anamnyń úıinde turatynmyn. Aldaǵy ýaqytta jańa páterge kóshýdi josparlap otyrmyn», - deıdi jas ǵalym Ajar Málik.
Sharadan soń jas ǵalymdar jańadan berilgen páterlerine baryp, alǵashqy sezimderimen bólisti.