Ál-Farabı atyndaǵy Qazaq ulttyq ýnıversıtetinde Qytaı ýnıversıtetteriniń kórmesi ótti. Sharany QazUÝ men QHR stıpendıalyq keńesi jáne Almaty qalasyndaǵy QHR bas konsýldyǵy uıymdastyrdy.
Kórmeniń ashylýyna QR Prezıdentiniń keńesshisi Málik Otarbaev, QR ǵylym jáne joǵary bilim Vıse-mınıstri Darhan Ahmet-Zakı, Qytaı stıpendıalyq keńesi Bas hatshysynyń orynbasary Tán Lýlý, QHR-dyń Almatydaǵy bas konsýly Szán Veı, ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev, QazUÝ Dırektorlar keńesiniń tóraǵasy Qaırat Mámı, Qytaı jáne Qazaqstan JOO-larynyń basshylary men bilim alýshy jastar qatysty.
QR Prezıdentiniń keńesshisi Málik Otarbaev Memleket basshysy Qasym-Jomart Toqaevtyń quttyqtaýyn jetkizip, sharanyń tabysty ótýine tilektestik bildirdi. «Qazaqstan men Qytaı memleketaralyq tyǵyz qarym-qatynas pen halyqaralyq baılanystyń jańa deńgeıine qadam basty. Memleket basshysy aǵymdaǵy jyly Qytaıǵa eki ret resmı saparmen baryp, birqatar kelisimderge qol jetkizdi. Prezıdent óz sózinde atap ótkendeı, búgingi tańda eki el arasynda yntymaqtastyqtyń altyn 30 jyldyǵy bastaldy. Saýda-sattyq, munaı-gaz, kólik-tranzıt jáne joǵary tehnologıa salalaryndaǵy jan-jaqty yqpaldastyq artyp jatyr. Sonyń ishinde ǵylym jáne joǵary bilim salasynda birlesken ınvestısıalyq jobalar júzege asyrylýda», – dedi Málik Otarbaev.
Óz kezeginde Darhan Ahmet-Zakı QR ǵylym jáne joǵary bilim mınıstri Saıasat Nurbektiń quttyqtaý hatyn oqyp berdi. Quttyqtaý hatta: «Qazirgi tańda joǵary bilim berý salasynda Qytaı men Qazaqstan seriktestigi tarıhı múmkindikterge, keń jáne keleshegi zor jobalarǵa toly. Búgingi qara shańyraq QazUÝ-da ótip jatqan kórme osynyń aıqyn kórinisi. Uıymdastyrylǵan kórme ǵylym men bilim berýdi damytýda da úlken mańyzǵa ıe. Sondaı-aq qos memleket arasynda stýdentter almasýǵa, tájirıbemen bólisýge múmkindik beredi», – delingen.
Jıynda ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev sóz sóılep, Qytaı ýnıversıtetteri kórmesiniń QazUÝ-da ótýi Qazaqstannyń bilim, ǵylym salasyndaǵy eleýli oqıǵa ekenin atap ótti. «Qazirgi tańda QazUÝ Qytaıdyń 51 joǵary oqý ornymen seriktestik ornatyp, tyǵyz jumys isteýde. Memleket basshysy Qasym-Jomart Toqaevtyń Qytaıǵa resmı sapary aıasynda oqý ordasynda Soltústik-batys polıtehnıkalyq ýnıversıtetiniń fılıalyn ashý jóninde kelisimge qol jetkizildi. Aǵymdaǵy jyldyń qazan aıynda atalǵan fılıal ashylyp, jumysyn bastady. Maqsat – ǵylymı baǵytta birlesip zertteý jumystaryn júrgizý, stýdent daıarlaý jáne oqytýshylar almasý. QazUÝ Qytaı ýnıversıtetterimen baılanysty jandandyrýǵa jáne nyǵaıtýǵa baǵyttalǵan barlyq jumystardy jalǵastyra beredi», – dedi rektor Janseıit Qanseıituly.
Jıyn sońynda qatysýshylar kórmeni aralap, Qytaı men Qazaqstan delegasıasy shaǵyn quramda kelissóz júrgizdi. Taraptar seriktestikti nyǵaıtýǵa, bilim men ǵylym salasyndaǵy baılanystardy tereńdetýge basa mán bere otyryp, eki el ýnıversıtetteri arasyndaǵy qarym-qatynastyń qazirgi jaı-kúıi men damý perspektıvasyn jan-jaqty talqylady.