Jıynda orta bilim berý sapasyn arttyrýdyń negizgi aspektileri men oqý úrdisin ońtaılandyrý ádisteri talqylandy.
2023 jyldyń 9 jeltoqsanynda Abaı ýnıversıtetinde QR Pedagogıkalyq ǵylymdar akademıasynyń prezıdenti, Abaı atyndaǵy QazUPÝ-dyń profesory Asqarbek Qusaıynovtyń «Orta bilim berý sapasyn kóterýdiń ǵylymı-praktıkalyq negizderi» monografıasynyń tusaýkeseri ótti, dep habarlaıdy Almaty-akshamy.kz
İs-sharaǵa QR Oqý-aǵartý mınıstri Ǵanı Beısembaev, Abaı atyndaǵy QazUPÝ, QazQyzPÝ, Abylaı han atyndaǵy QazHQ jáne ÁTÝ, ál-Farabı atyndaǵy QazUÝ ókilderi, sonymen qatar kolej oqytýshylary men mektep dırektorlary qatysty.
Ǵanı Beısembaev monografıa avtoryn quttyqtap, pedagogıkalyq joǵary oqý oryndarynyń elimizdegi barlyq mektepterge pedagog kadrlaryn daıarlaýdaǵy róline toqtaldy. Ulttyq baıandama jobasynyń bilim berýdi damytýǵa baǵyttalǵan negizgi qujat ekenin aıta kele, mınıstr bilim salasyndaǵy qoljetimdilik pen teńdikti qamtamasyz etý, qolaıly bilim berý ortasyn qurý jáne adamı kapıtaldy damytýdy qamtıtyn ortaq mindetterdi júzege asyrý jolyndaǵy eki mınıstrliktiń birlesken jumysyn erekshe atap ótti.
QR Ǵylym jáne joǵary bilim mınıstrligi men Oqý-aǵartý mınıstrligi arasynda jaqynda qol qoıylǵan memorandým aıasynda joǵary oqý oryndarynyń rektorlary men bilim basqarmalarynyń basshylary bilim berý sapasyn arttyrý jáne joǵary bilikti pedagog kadrlardy daıarlaý boıynsha belsendi jumys atqaryp jatqany aıtyldy. Sondaı-aq birlesken ǵylymı zertteýler júrgizilip, bilim jáne ǵylym salalarynda yntymaqtastyq ornatý bastamalary júzege asyrylatyn bolady.
Monografıanyń tusaýkeser rásiminde orta bilim berý sapasyn arttyrýdyń negizgi aspektileri men oqý úrdisin ońtaılandyrý ádisteri talqylandy. Sondaı-aq turaqty damýǵa qol jetkizý úshin mektepter men joǵary oqý oryndary arasyndaǵy ózara yntymaqtastyq ornatýdyń mańyzdylyǵy erekshe atap ótildi. Qatysýshylar profesor Asqarbek Qusaıynovtyń monografıasynyń ǵylymı-tájirıbelik qundylyǵyn joǵary baǵalap, bul eńbekti respýblıka boıynsha bilim berý uıymdarynda – mektepterde, pedagogıkalyq kolejder men joǵary oqý oryndarynda talqylaýdy usyndy.