Ál-Farabı atyndaǵy Qazaq ulttyq ýnıversıtetinde Qazaqstandaǵy «Jibek joly» ádebıet aptalyǵynyń saltanatty ashylý rásimi ótti.
Aptalyqtyń basty maqsaty – Jibek joly boıyndaǵy kórshi memleketterdiń mádenı baılanysyn nyǵaıtý, eki el arasyndaǵy aǵartýshylyq jáne óner salasyndaǵy qarym-qatynasyn jańa deńgeıge kóterý.
Halyqaralyq is-sharaǵa Almaty qalasy ákiminiń orynbasary Azamat Qaldybekov, Qytaı komýnıstik partıa ortalyǵy nasıhattaý bóliminiń jaýapty orynbasary Hý Hepın, QazUÝ-dyń Basqarma Tóraǵasy – Rektor Janseıit Túımebaev, Almatydaǵy QHR bas konsýly Szán Veı, Qytaı kitap ımporty jáne eksporty korporasıasynyń atqarýshy dırektory Lı Hýnven, oqytýshy-professorlar quramy men belgili ǵalymdar, bilim alýshy jastar qatysty.
Aptalyqtyń ashylý saltanatynda QazUÝ rektory Janseıit Túımebaev sóz sóılep, aýqymdy jıynnyń mańyzyna toqtaldy. Rektor óz sózinde Qazaqstan men Qytaı yntymaqtastyqtyń «altyn dáýirine» qadam basqanyna basa mán berdi.
«Qytaı men Qazaqstan ádebıeti arasyndaǵy baılanys tereńde jatyr. Uly Jibek joly tek saýda baǵyty ǵana emes, sonymen qatar mádenıet, eki eldiń ádebı dástúrin baıytýǵa, órkenıettiń damýyna aıryqsha úles qosty. Búgingi tańda qos memlekettiń ádebı baılanysy joǵary sıpatqa ıe, kórkem shyǵarmalardy aýdarý men ǵylymı almasýdy damytýdyń arqasynda kúsheıe túsýde. Qytaı dástúrinde ádebıet bilim berýdiń, ózin-ózi tanýdyń jáne fılosofıalyq ıdeıalardy bildirýdiń qýatty quraly retinde qabyldanady. Qazaq mádenıetindegi ádebı shyǵarmalar – halqymyzdyń shynaıy qazynasy, onyń tamyry myńdaǵan jyldardan bastaý alady. Sondyqtan mádenı baılanysty jandandyrýda qos taraptyń da múmkinshiligi joǵary», – dedi rektor.
Sondaı-aq Janseıit Túımebaev joǵary bilim men ǵylym salasyndaǵy QazUÝ-dyń Qytaı JOO-larymen birlesip júzege asyryp jatqan jumystaryna toqtaldy. Qazirgi tańda ýnıversıtet Qytaıdyń 65 ýnıversıtetimen kelisim jasasqan. Nátıjesinde oqý ordasynyń bazasynda Qytaı tarapymen birlesken ǵylymı ortalyqtar men zerthanalar iske qosyldy. 2023 jyly QazUÝ-da Qytaıdyń Soltústik-batys polıtehnıkalyq ýnıversıtetiniń fılıaly ashyldy. Budan bólek, Konfýsıı ınstıtýty men Qytaıtaný kafedrasy tabysty jumys isteıdi.
Sharada Almaty qalasy ákiminiń orynbasary Azamat Qaldybekov: «Almaty – Qazaqstannyń mádenı jáne bilim berý ortalyǵy ǵana emes, ejelden Uly Jibek jolynyń mańyzdy toraby bolǵan qala. Búgingi is-shara ádebıet, tarıh, halyqaralyq yntymaqtastyq jáne adamgershilik qundylyqtarǵa degen umtylysty biriktirgen sımvoldyq oqıǵa», – dep atap ótti.
Almatydaǵy QHR bas konsýly Szán Veı Qazaqstandaǵy «Jibek joly» ádebıet aptalyǵy aıasynda mádenıet pen ádebıet baǵytynda ortaq jobalar men jańa bastamalar iske asyrylatynyn jetkizdi. «Qazaqstan men Qytaı –tatý kórshi, mańyzdy strategıalyq seriktes ári basty odaqtas memleket. Búginde eki el gýmanıtarlyq salada úlken jetistikterge qol jetkizip keledi. Halyqtardyń júregin jaqyndastyratyn altyn kópir – ádebıet. Sońǵy jyldary Qytaı men Qazaqstan arasyndaǵy baılanys nyǵaıa túsken saıyn, qazaq halqynyń Qytaıdy tanýǵa degen yntasy artyp keledi. Sol sıaqty qytaı halqynyń da qazaq tarıhyna degen qyzyǵýshylyǵy basym», – dedi bas konsýl.
Aptalyq aıasynda qurmetti qonaqtar Ál-Farabı atyndaǵy Qazaq ulttyq ýnıversıteti Farabı kitaphanasynyń qoryna Qytaıdyń 100 úzdik kitabyn tartý etti.
Plenarlyq otyrys túrli taqyryptarǵa arnalǵan seksıalarda jalǵasty.