Almaty qalasy boıynsha Qylmystyq-atqarý júıesi departamentine qarasty №11 mekemede shaǵyn fýtboldan joldastyq kezdesý ótti.
Atalǵan mekemede, naqtyraq aıtsaq, balalar kolonıasynda sport dese ishken asyn jerge qoıatyn jasóspirim óte kóp. Buryn teńbil dop saıysy túzeý mekemesindegi balalar men qaladaǵy kolej stýdentterinen quralǵan komandalar arasynda uıymdastyrylatyn.
Bul joly jasyl alańǵa jazasyn ótep jatqan jasóspirimdermen birge, Almaty ortalyq meshitiniń, «Ábý-Bákir» jáne «Ismıhan» meshitteriniń ımamdarynan jasaqtalǵan komanda shyqty. №11 mekeme komandasy men «Meshit ımamdarynyń» fýtbol komandasy arasynda oıyn tartysty da qyzyqty ótti. Esep – 10:6. Túzeý mekemesiniń tárbıelenýshileriniń toby jeńiske jetti. Jeńimpaz balalarǵa Almaty qalasynyń bas ımamy Ospan Dádiluly bastaǵan ımamdar sporttyq aıaq kıimder, teńbil doptar tartý etti.
– Mundaı sporttyq is-sharanyń maqsaty – jasóspirimderdiń densaýlyǵyn nyǵaıtýǵa dáneker bolý, olarǵa salaýatty ómir saltynyń paıdasyn nasıhattaý jáne syrtqy ortamen baılanysyn úzip almaýǵa jaǵdaı jasaý, – deıdi tárbıe bóliminiń bastyǵy ádilet podpolkovnıgi Alma Bázilbaeva.