Almaty qalalyq Psıhıkalyq saýyqtyrý ortalyǵynyń emdelýshileri «Balalyq shaq qaıda ketti?» degen qoıylymdy sahnalap, kórermenge ónerin pash etti. Olar bul kóriniske 4 aı boıy daıyndalyp, Halyqaralyq balalardy qorǵaý kúni qarsańynda kishkentaı pasıentterge jáne medısına qyzmetkerlerine usyndy.
Naýqas jasóspirimderdi teatr ónerine baýlyp, sahna tórinde óz boıyndaǵy qorqynyshpen kúresýge jáne kópshilik aldynda sóıleýge jigerlendirip júrgen art- terapevt Darıash Qasymova bul qoıylymda jasóspirimder balalyq shaqpen qoshtasyp, ata-anaǵa perzentine kóńil bólýdiń mańyzdy ekenin, júregindegi tilegin estirtýge tyrysady deıdi.
”Olar eresekterdi kámelet jasqa tolmaǵandardyń pikirin qurmetteýge shaqyrady. Árbir kórinistiń astarynda shynaı ómirde ul-qyzdar aıta almaı júrgen jáne árbir kezeńde olardyń ózin-ózi kórsetýge umtylysy, qaınap jatqan tirshiliktiń bir múshesi bolyp qalyptasýǵa áreketi, qorshaǵan ortanyń qupıasyn bilýge talpynysy baıqalady. Senarı avtorlary da, keıipkerleri de — ortalyqtyń pasıentteri. Balalar ózderi oılap tapty,” - deıdi Darıash Qasymova.
Sondaı-aq, ortalyqtyń balalar bóliminiń dálizinde sýretshiler kórmesi ótti. Emdelýshiler balalyq shaqqa saıahat jasap, jarqyn sátti, jaqyn adamdy nemese ómirindegi umytylmas kún, oqıǵany qylqalammen aq qaǵazǵa beıneledi. Kórmege qoıylǵan shyǵarmalardyń basym bóligi — janýarlar men oıynshyqtardyń sýreti. Eki avtor-bala ǵana ata-anasyn eske túsirgen. Al bir emdelýshi aq shashty ájesin saǵynǵan sekildi. Saıabaqta bireýdi kútip otyrǵan qarıanyń beınesi kórmege kelgen qonaqtardyń qyzyǵýshylyǵyn oıatty. Ár týyndynyń astarynda balalardyń balalyq shaqqa saǵynyshy menmundalap jatqandaı.
Ári qaraı merekelik is-shara asqanada jalǵasty. Emdelýshiler sheberlik dáriske qatysyp, tuzdy sýǵa qamyr ılep, oǵan boıaý qosyp, mysyqtyń músinin jasady. Shyǵarmashylyqqa baýlý arqyly olardyń oılaý qabiletin damytý, kúızelisten arylýǵa kómektesý deıdi mamandar.
Almaty qalasynda 3 myńǵa jýyq bala, jasóspirim psıhıkalyq dınamıkalyq baqylaýda tur.
Iá, Almaty qalalyq Psıhıkalyq ortalyqtyń ǵımaraty erekshe balalardyń shyǵarmashylyq alańyna aınaldy. Ortalyqtyń dárigerleri, medısına qyzmetkerleri qoǵamnan oqshaý ómir súretin kishkentaı naýqastardy mereke qarsańynda osylaı qýantty
Elimizde bastalǵan «Dáriger – balalardyń janashyry» aksıasy aıasynda olar baqsha ónimderin egý, baptaýdyń qyr-syryn úıretetin sheberlik dárisine qatysty.
Psıhıkalyq aýrýǵa shaldyqqan balalar úshin art-terapıa, eńbek terapıasynyń paıdasy zor. Qylqalamnyń qudireti emdelýshige emosıasyn bildirýge, ishindegi qorqynysh pen ýaıymyn búkpeı aqtaryp, mazalaǵan keselmen kúresýge múmkindik beredi. Ári naýqastyń shyǵarmashylyq daǵdylaryn damytý arqyly ózin-ózi baǵalaýdy jetildirýge paıdasy zor deıdi Balalar bóliminiń meńgerýshisi Olga Aleksandrova.