Qazirgi sátte Ál-Farabı atyndaǵy Qazaq ulttyq ýnıversıtetiniń oqytýshy-professorlar quramynyń 50 paıyzy (1142), qyzmetkerlerdiń 44 paıyzy (843), al stýdentterdiń 22 paıyzy (4001) ekpe aldy. JOO-daǵy stýdentter arasynda koronavırýsqa qarsy vaksına alý aksıasy aıasynda 100 stýdentke jataqhanaǵa ornalasý úshin 50 paıyz jeńildik berildi.
Oqytýshy-professorlar quramy men qosalqy personaldarǵa ártúrli deńgeıdegi áleýmettik kómek kórsetilip, qyzmetkerlerge arnalǵan jataqhanadan oryn berildi.
Ekpe alýshylardyń barlyǵyna, onyń ishinde 4001 stýdentke ımıjdik ónimder, sporttyq kostúmder, kitaptar taratyldy. 40-qa jýyq oqytýshy-qyzmetkerler men stýdentterden quralǵan alǵashqy top tegin joldama alyp, Ystyqkól jaǵalaýyndaǵy sporttyq-saýyqtyrý lagerine baryp qaıtty.
Ekpe alýshylar úsh kún boıy sýǵa shomylyp, taza aýada serýendedi. Jastar túrli oıyndar uıymdastyryp, óz ónerlerin ortaǵa saldy. Biri áýelete án shyrqasa, endi biri jyr shýmaqtarynan shashý shashty. Al ustazdar qaýymy kóshbasshylyq qasıetterdi damytý, ýaqytty tıimdi paıdalaný taqyryptarynda semınar-trenıngter ótkizip, tulǵalyq damýdaǵy óz tájirıbelerimen bólisti.
QazUÝ qyzmetkeri Nurbek Nurjanuly: «Tumsa tabıǵat aıasyndaǵy demalys barshamyzdy bir serpiltip tastady. Qarbalas tirshilikten bir sát sergip, tamasha kóńil-kúıge bólendik. Keremet demalys úshin ýnıversıtetke myń alǵys!» – degen júrekjardy pikirin bildirdi.
QazUÝ-da qyrkúıek aıynda 1-15 shilde aralyǵynda ekpe alǵan oqytýshylar men bilim alýshylarǵa ýnıversıtet asqanasyna bir aıǵa talon berilip, qosymsha qoǵamdyq kólikte júrý aqysy tólenedi. Sondaı-aq til úırený kýrstaryna sertıfıkat tartý etiledi. Jaqyn kúnderi ekinshi top Ystyqkólge demalysqa attanady.
