Ál-Farabı atyndaǵy Qazaq ulttyq ýnıversıtetiniń Dárilik ósimdikterdi ǵylymı-zertteý ortalyǵynyń bazasynda Qazaqstan-Qytaı densaýlyqqa paıdaly taǵamdardy zertteý ortalyǵy ashyldy.
Ortalyqty QazUÝ-dyń Basqarma Tóraǵasy-Rektor Janseıit Túımebaev pen Beıjiń tehnologıa jáne bıznes ýnıversıtetindegi tamaqtaný jáne densaýlyq fakúltetiniń profesory Lú Sınsı iske qosty, dep habarlaıdy aqshamnews.kz.
Atalǵan ǵylymı ortalyq elimizde ósetin dárilik ósimdikterdi tereńirek zertteýge jol ashady. Sonyń ishinde Qazaqstandaǵy soıa burshaǵynyń qasıeti men quramyna taldaý jáne saraptama jasalady. Nátıjesinde soıa burshaǵynan adam aǵzasyna paıdaly taǵam túrlerin ázirleý boıynsha jumystar júrgiziledi.
Kezdesý barysynda Janseıit Túımebaev qurmetti qonaqtarǵa QazUÝ-dyń ǵylymı ınfraqurylymy týraly aqparat berip, ýnıversıtettiń Qytaı JOO-larymen birlesip atqaryp jatqan jumystarǵa toqtaldy.
«Qazirgi tańda QazUÝ 60-qa jýyq qytaılyq ýnıversıtetpen tyǵyz baılanys ornatqan. Osy rette Beıjiń tehnologıa jáne bıznes ýnıversıtetimen yntymaqtastyqty odan ári tereńdetýge nıettimiz. Sonyń ishinde ortaq ǵylymı jobalardy júzege asyrýǵa, oqytýshylar men stýdentter almasýǵa, birlesken ǵylymı konferensıalar men sımpozıýmdar ótkizýge daıynbyz», – dedi rektor.
Óz kezeginde Qytaı profesory Lú Sınsı iltıpat bildirgeni úshin oqý ordasynyń basshylyǵyna rızashylyǵyn jetkizip, óziniń ǵylymı-ınnovasıalyq jobasy týraly málimet berdi.
«Beıjiń tehnologıa jáne bıznes ýnıversıteti – bıologıa salasynda kóshbasshy JOO-lardyń biri. Bizdiń ǵylymı top soıa burshaǵynan adam aǵzasyna paıdaly nan, et, sýsyn, balmuzdaq ónimderin ázirlep shyǵardy. Qan qysymyn retteýge, asqazan-ishek joldaryn tazartýǵa kómektesedi. Sonymen qatar adamǵa kúsh-qýat beredi. Qazirgi ýaqytta bul ónimder Qytaıda satylady. Búginde atalǵan ónimderdi Qazaqstan naryǵyna alyp kelýdi kózdep otyrmyz. Búgin iske qosylǵan ortalyq Qazaqstandaǵy soıa burshaǵyn jáne ózge de paıdaly ósimdikterdi jan-jaqty zertteýge baǵyttalǵan», – dedi Lú Sınsı.
Kelissóz barysynda taraptar seriktestikti arttyrý, ǵalymdar arasyndaǵy áriptestik baılanysty damytý jóninde pikir almasty.