Ál-Farabı atyndaǵy Qazaq ulttyq ýnıversıtetinde «Altaı halyqtarynyń jer-sý ataýlary» Hİ halyqaralyq sımpozıýmy ótti. İs-sharany Altaı qaýymdastyǵynyń akademıasy men Ál-Farabı atyndaǵy QazUÝ birlesip uıymdastyrdy.
Sımpozıýmnyń negizgi maqsaty – ejelgi zamannan búginge deıin jazbasha jáne aýyzsha jetken derekkózderdi keńinen zertteý, taıpalardyń, jer-sý ataýlarynyń fonetıkalyq jáne morfologıalyq ózgeristeriniń sebepterin taldaý jáne ǵalymdardyń halyqaralyq yntymaqtastyq traektorıasyn keńeıtý.
Jıyndy Ál-Farabı atyndaǵy Qazaq ulttyq ýnıversıtetiniń Basqarma Tóraǵasy – Rektory Janseıit Túımebaev quttyqtaý sózben ashty. Sımpozıýmǵa qatysýshylardy qarsy ala otyryp, Qyrǵyzstan, Túrkıa, Túrikmenstan, Ózbekstan, Ázirbaıjan, Reseı, Japonıa, Vengrıa, Polsha, Taıvan jáne t.b. elderdiń ǵalymdaryn jınaǵan aýqymdy ǵylymı sharanyń mańyzdylyǵyn atap ótti.
«Túrkitektes ǵalymdar men sheteldik zertteýshiler jyldar boıy Altaı álemin zerttep keledi. Bul baǵyttaǵy jumystar Táýelsizdik alǵannan keıin bastaldy. «Halyqaralyq Altaı qaýymdastyǵy sımpozıýymy» ataýymen dástúrli túrde ótkizilip kele jatqan akademıalyq platforma jyl saıyn taqyryptyq keńistigin keńeıtýde. Búgingi sımpozıým Eýrazıa keńistigindegi túrki, mońǵol, tuńǵys, manchjur, majar, japon, koreı jáne basqa da halyqtar arasyndaǵy tarıhı-mádenı baılanystar týraly kúrdeli de qyzyqty ǵylymı zertteýge jańa serpin beredi degen senimdemiz», - dedi rektor.
Sondaı-aq plenarlyq otyrysta Altaı sımpozıýmdary komıtetiniń tóraǵasy, profesor Ilhan Shahın, Túrkıanyń Qazaqstandaǵy bas konsýly Alı Ryza Akynjy, Sherhan Murtaza atyndaǵy Taraz ınovasıalyq-gýmanıtarlyq ýnıversıtetiniń profesory, fılologıa ǵylymdarynyń doktory Erbolat Saýryqov, Halyqaralyq túrkologıalyq zertteýler ortalyǵynyń dırektory, QR UǴA korespondenti Erden Qajybek jáne t.b. sóz sóılep, óz pikirlerin ortaǵa saldy.
Sımpozıým aıasynda altaıstıkanyń túrli baǵyttary boıynsha seksıalar jumysy ótti.
Ál-Farabı atyndaǵy QazUÝ-dyń Baspasóz qyzmeti