Ál-Farabı atyndaǵy QazUÝ arheologıalyq ekspedısıasy Taldyqorǵan qalasy áýejaıy mańyndaǵy Daýylbaı qorymynda qazba jumystaryn júrgizip, erte temir dáýirine jatatyn qorǵannan erekshe qundy buıymdar tapty.
Dalalyq zertteýler barysynda qorǵannyń birneshe ret tonalǵany, sońǵy ret ótken jyly ǵana tonalyp ketkeni anyqtaldy. Osyǵan baılanysty Jetisý oblysynyń tarıhı-mádenı murany qorǵaý jónindegi ortalyǵy arheologtardyń kúshimen atalǵan tarıhı eskertkishti zertteýdi jón dep tapty, dep habarlaıdy Almaty-akshamy.kz QR Ǵylym jáne joǵary bilim mınıstrligine silteme jasap.
Mamandardyń pikirinshe, qorǵan elıtalyq bolyp sanalady. Onyń bıiktigi – 3,4 m, dıametri – 40 m. Aınalasy ormen qorshalǵan. Tonaýshylar batys jaǵynan qazyp, birtindep ortalyq bóligine qaraı ótken. Dalalyq zertteýler tonaýshylar ashyp ketken uńǵyma-shuńqyr ornyndaǵy qorǵannyń ortalyq bóliginde júrgizildi. Bastapqyda qazba 5h5 m kólemde boldy jáne eskertkish konstrýksıasyna oraı keńeıtildi. Qazba barysynda tas saýyt jáne ózge de konstrýksıalar, sondaı-aq tonaýshylardan qalǵan shashylyp jatqan iri tastar, tastaqtaıshalar anyqtaldy.
«Qorǵannyń tóbesinen eseptegende shamamen 5 m tereńdikten eki mola shuńqyry anyqtaldy. Birinshi qabir shuńqyry tolyqtaı tonalǵan. Bul jerden qoıdyń jaýyryn súıegin ǵana tabý múmkin boldy. Bul súıek ǵuryptyq as qaldyǵy bolýy múmkin. Ekinshi qabir shuńqyrynan er adamnyń súıek qaldyqtary, eki keramıkalyq ydys, mal súıekteri, qyzǵylt tústi aǵash qynaby bar aqınaq-semser tabyldy. Aqınaq tusynda metal jáne súıek qapsyrmalar jatty. Sonymen qatar qoladan jasalǵan qoramsaq ilgegi, qola oqshantaı men ıne, altynnan daıyndalǵan ilmeksheler tabyldy. Tabylǵan altyn buıymdar: beldik ilmeshegi, tútikshe, sondaı-aq mysyq tuqymdasyna jatatyn ań beıneli aıylbastar. Tabylǵan buıymdardyń ishindegi eń erekshesi – sheberdiń qolynan shyqqan, ádemi bezendirilgen jylan-aıdahar beıneli súıek qapsyrma. Mundaı olja otandyq arheologıada sırek kezdesedi. Ol óńirdegi ejelgi turǵyndar arasynda jylan, aıdahar nemese jylan-aıdahar kúlty taralǵanyn kórsetedi», - deıdi arheologıalyq ekspedısıa jetekshisi, tarıh ǵylymdarynyń doktory, profesor Dosbol Baıqonaqov.
Mamandardyń sózinshe, qazylǵan qorǵandy budan eki myń jyldaı buryn Jetisýdy mekendegen ıýechjı nemese úısin mádenıetterimen baılanystyrýǵa bolady. Budan ary qaraı arheologtar zerthanalyq jumystar júrgizýdi josparlap otyr. Barlyq buıymdarǵa arnaıy zertteý júrgizilip, ǵylymı taldaýlar jasalady. Keıbir oljalar «Ostrov Krym» ǵylymı-restavrasıalyq laboratorıasynda qalpyna keltiriletin bolady.
Aıta keteıik, bul jumystar «Jetisý oblysynyń tarıhı-mádenı murany qorǵaý jónindegi ortalyǵy» men Jetisý oblysynyń mádenıet, arhıvter jáne qujattama basqarmasy tapsyrysy aıasynda iske asty.