Almatyda avtobýs júrgizýshisi rúlge ıe bola almaı baǵdarsham men gaz qubyryna soǵylyp, jaıaý júrginshini qaǵyp ketti.
Oqıǵanyń vıdeosy áleýmettik jelide tarady. Beınejazbadan №100 jolaýshylar avtobýsy joldyń shetine shyǵyp ketkenin kórýge bolady, dep habarlaıdy Almaty-akshamy.kz.
Almaty qalalyq Polısıa departamentiniń málimetinshe, jol-kólik oqıǵasy 23 qazan kúni túski saǵat 12:00 shamasynda Medeý aýdanynda boldy.
«Foton» avtobýsynyń júrgizýshi Halıýllın kóshesimen batys baǵytta kele jatyp Táttibekov kóshesiniń qıylysynda rúlge ıe bola almaı, jol jıegine shyǵyp baǵdarsham men gaz qubyryna soǵyldy», - dep habarlady departamentten.
Jol apaty saldarynan 59 jastaǵy jaıaý júrginshi zardap shekti. Ol aýrýhanaǵa jetkizildi.
«Bul fakti boıynsha Medeý aýdandyq polısıa basqarmasy tekserý jumystaryn bastady. Tıisti saraptamalar taǵaıyndalady, mán-jaı anyqtalýda», - dep atap ótti vedomstvodan.