Qazaq sport jáne týrızm akademıasynyń Prezıdenti Qaırat Zakıránov men QR etnosport qaýymdastyǵynyń vıse-prezıdenti Tastanbek Esentaev ekijaqty kelisim shartqa qol qoıdy.
Maqsat - birlese otyryp ulttyq sport túrlerinen, sonyń ishinde at sportyn damytý maqsatynda bilim berý baǵdarlamasyn qurastyrý, dep habarlaıdy Almaty-akshamy.kz QR Ǵylym jáne joǵary bilim mınıstrligine silteme jasap.
«Aýdaryspaq, jamby atý, kókpar, báıge sıaqty ulttyq sport túrleri - ata-babalarymyz mura etken asyl qazyna. Atqa miný, shabý – bizdiń qanymyzda bar qasıet. Ulttyq qundylyǵymyzdy joǵaltpaı, halyqaralyq dárejede kóterýdi qolǵa alǵanymyz jón. At sportyn damytý úshin barynsha qyzmet etýge Qazaq sport jáne týrızm akademıasy da árdaıym yqylasty», - dedi Qaırat Zakıránov.
Aldaǵy ýaqytta bilim berý baǵdarlamasyn ázirleý jáne iske asyrý jónindegi birlesken is-sharalardy ótkizý jospada tur. At sport túrlerinen jarystardy, forýmdardy, sporttyq-saýyqtyrý is-sharalaryn, konferensıalardy, semınarlardy, sımpozıýmdardy, ǵylymı zertteý jobalaryn daıyndaý jáne ony iske asyrý, bolashaq mamandardy daıarlaýda zamanaýı ınovasıalyq ádistemelerdi qoldaný sıaqty aýqymdy jumystar kúntizbege engiziledi.