Fakúltet dekandary men kafedra meńgerýshileriniń laýazymdaryna konkýrs jarıalandy
Qazaq ulttyq agrarlyq zertteý ýnıversıtetinde sońǵy ýaqytta basqarý júıesinde, bilim berý men ǵylymdy damytýǵa baılanysty úlken ózgerister júrip jatyr.
Jańa zaman talabyna saı halyqaralyq deńgeıdegi ýnıversıtet ataný úshin, eń aldymen básekege qabiletti myqty kadrlary bolýy tıis. Bul - naryq zańdylyǵy. Osy talaptardyń negizinde ýnıversıtet basshylyǵynyń usynysy boıynsha, profesor-oqytýshylar quramynyń (POQ) eńbekaqysy 45 paıyzǵa deıin, kafedra meńgerýshileri men fakúltet dekandarynyń jalaqysy 1,5 esege kóterildi. Ǵylym doktory dárejesi bar kafedra meńgerýshileri 450 myń teńgege deıin, fakúltet dekandary 550 myń teńgege deıin alatyn bolady.
Osy atalǵan ózgerister men qolǵa alynyp jatqan ózge de ınovasıalyq bastamalar týraly ýnıversıtettiń Basqarma Tóraǵasy-rektory, QR UǴA akademıgi Aqylbek Kúrishbaev jas ǵalymdarmen kezdesýde keńinen toqtalyp ótti.
«Búgin ózderińizben aqyldasý úshin birneshe máseleni nazarlaryńyzǵa usynamyn. Eń aldymen, ýnıversıtettiń basqarý júıesin jetildirý maqsatynda bilimdi, bilikti jas kadrlarlarmen tolyqtyrýymyz qajet. Osyǵan oraı, 6 fakúltettiń dekandary men 27 kafedra meńgerýshileriniń laýazymdaryna 1 aqpanǵa deıin konkýrs jarıalanyp otyr. Osy konkýrsqa sizderdi jáne jalaqynyń tómendigine baılanysty erterekte basqa mekemelerge aýysyp ketken tanymal jas ǵalymdarymyzdy qatysýǵa shaqyramyn», - dep atap ótti Aqylbek Qajyǵululy.
Sondaı-aq, kezdesý barysynda irgeli jáne qoldanbaly ǵylymnyń damýyna eleýli úles qosqan jas ǵalymdardyń ınovasıalyq ázirlemelerin (ıdeıalaryn) jáne ozyq jetistikterin qoldaý, aýyl sharýashylyǵy keshenin damytýǵa yqpal etetin ǵylymı zerthanalar jumysyn kúsheıtý, ǵylym jetistikterin praktıka júzinde oqý úderisine engizý, jastardyń álemdik jetekshi JOOlardyń ár baǵyttaǵy ǵylymı jobalaryna odan ary belsene qatysý máseleleri qyzý talqylandy. Bul rette, ýnıversıtet ǵalymdarynyń ǵylymı izdenisterin materıaldyq turǵyda qoldaý maqsatynda KPI júıesi negizinde yntalandyrý sharalary jalǵasyn tabatyndyǵy atap aıtyldy.
Taǵy bir mańyzdy taqyryp – halyqaralyq arenada QazUAZÝ-dyń mártebesin kóterý, ǵylym men bilim berý salasynda, agroónerkásiptiń ózekti máseleleri boıynsha birlesken ǵylymı zertteýler júrgizý, jańa tehnologıalardy transfert jasaý, básekege qabiletti mamandardy birlese daıarlaý múmkindikteriniń aıasyn keńeıtý týraly pikir almasyldy. Sonymen birge, ýnıversıtettiń POQ jáne qyzmetkerlerine óz ǵylymı tabystary men eńbekterin álemdik ǵylymı ortaǵa tanytý, Scopus jáne Web of Science derekqoryndaǵy basylymdarǵa jarıalaný úshin aǵylshyn tilin ıgerý boıynsha kýrstar men arnaıy kovorkıng ortalyǵy ashylatyny aıtyldy.
Kezdesý óte jyly jáne erkin áńgime jaǵdaıynda ótti. Jas ǵalymdar Qaısar Tabynov, Qýantar Alıhanov, Maıra Qusaıynova, Gúlsim Aıtqhojaeva, t.b. ózderimen ashyq dıalog uıymdastyrǵan ýnıversıtet basshylyǵyna rızashylyqtaryn bildirip, zamanaýı halyqaralyq dárejedegi agrarlyq zertteý joǵary oqý ornyn qurý úshin belsendilikpen qyzmet etýge árqashan daıyn ekendikterin jetkizdi.
Ýnıversıtettiń basshysy Aqylbek Kúrishbaev jas ǵalymdardyń barlyq suraqtaryna jaýap berip, adaǵy birlesken qyzmette tabysqa jete berýlerine sáttilik tiledi.
QazUAZÝ baspasóz qyzmeti