Kórmege sýretshiniń 200-den astam týyndysy qoıylady
QR Memlekettik Ortalyq mýzeıinde elimizge tanymal karıkatýrashy-sýretshi, QR mádenıet qaıratkeri, QR Sýretshiler, Jýrnalıser, Jazýshylar odaqtarynyń múshesi Nurazhan Erkin Ibragımulynyń «Karıkatýra tarlany» atty kórmesi ashylady.
Erkin Nurazhan – qazaq beıneleý ónerinde karıkatýra, sharj (dostyq ázildi portret) janrynyń qalyptasyp, damýyna ózindik qoltańbasyn qosqan, búginde tanymal kóshbasshysy sanalatyn belgili sýretshi.
1982 jyldan beri ádebıet, óner, qoǵam qaıratkerleriniń ázil portretter galereıasyn jasap keledi. Ol elimiz táýelsizdik alǵan jyldar ishinde áleýmettik-ekonomıkalyq, saıası ómirimizdegi keleńsiz qubylystardy synǵa alǵan satıralyq sýretter toptamasyn dúnıege ákeldi. Sondaı-aq, oqyrmandarǵa ózekti máselelerdi kótergen maqalalary jáne derekti dúnıelerimen tanylǵan qalamger.
Sýretshiniń barǵan taqyryptary ár alýan, beınelegen keıipkerleri sań qyrly minez-qulyqty bolsa, sýret salýdaǵy tehnıkasy tym qarapaıym. Qaǵaz, qalamush, týsh, akvarel boıaýy, geldi qalam, túrli-tústi qaryndashtar. Karıkatýrashyny shyǵarmashylyqqa jetelegen de – ómirdiń ózi.
Qoǵam men adam, saıasat pen zaman keńistiginde qaıshylasqan múddeler maıdany men keraǵar kózqarastardy jiti baqylap, aq-qarasyn anyqtap, ishke jıǵan-túıgenin el nazaryna usynady.
Kórermenin beıjaı qaldyrmaı, qoǵamymyz ben zamanymyzdyń kiltıpanyn tabýǵa úndep, sol prosesterge qatysýǵa, oı túıýge, árkim óz tuǵyryn ( pozısıasyn) anyqtap alýǵa shaqyrady. Sodan da sýretshiniń azamattyq pozısıasy anyqtala túsedi. Ol ádildik pen adaldyq, shyndyq pen aqıqat jaǵynda bolsa, qara halyqtyń muń-muqtajyn aıtyp, ómirdegi ózgeristerge solardyń turǵysynan qarap baǵasyn bere alsa, naǵyz halyqshyl sýretshi, óz eliniń patrıoty degen sóz.
«Karıkatýra tarlany» kórmesi sonyń dálelindeı kórermenin shynshyl da aıqyn syrlarǵa toly dúnıetanymymen tabystyrady. Táýelsizdik alǵan elimizdiń damýyna kedergi keltirer keritartpa kúshterdi kelekelep kóz aldymyzǵa ákeledi. Bizderdi beıǵam da nemquraıly júrmeı, elimiz ben jerimiz úshin belsendi kúresker bolýǵa shaqyrady.«Ózine ózi kúle bilgen halyq - uly halyq» dep fransýzdar aıtqandaı, kúle bilýdiń bir joly osy karıkatýralyq týyndylar. Karıkatýra – ashshy aıtylǵan syn. Degenmen, Erkin Ibragımuly ashshy shyndyqty astarlap, týyndylarynda obrazdar arqyly oı týdyryp, bolmysymyzdyń kúngeıi men kóleńkesin kórsete bilgen. «Kúlkiniń ar jaǵynda mazaq emes – mazasyzdaný, jazǵyrý emes – jan ashý jatqanyn jurt túsinse deımin. Qulaǵandy turǵyzý, qıraǵandy bútindeý, jylaǵandy jubatý, kerenaýdy oıatý, muńaıǵandy ezý tartqyzý – satıralyq sýretterdiń abzal boryshy bolyp qala bermek» - deıdi sýretshi.
2023 jyldyń 17 qańtarynda, saǵat 15.00-de mýzeı qoryna 500-den astam eńbekterin syıǵa tartqan sýretshiniń 200-den astam týyndylary kórmede oryn alady.
Kórme 2023 jyldyń 31 qańtaryna deıin jumys isteıdi.