Bul týraly mınıstr Tamara Dúısenova málimdedi.
Eńbek jáne halyqty áleýmettik qorǵaý mınıstrligi eldegi barlyq 116 medısınalyq-áleýmettik mekemege tekseris júrgizýdi josparlap otyr, dep habarlaıdy Almaty-akshamy.kz
Eńbek mınıstriniń aıtýynsha, múgedektigi bar adamdar bar otbasylar úshin arnaýly áleýmettik qyzmetterdiń qoljetimdiligin qamtamasyz etý jóninde sharalar qabyldanady. Osy maqsatta áleýmettik qyzmet kórsetý júıesin transformasıalaý josparlanyp otyr.
«Birinshisi – barlyq 116 medısınalyq-áleýmettik mekemege arnaıy qyzmet kórsetý standarttarynyń saqtalýyna tekseris júrgiziledi. Olardyń qorytyndysy boıynsha óńir ákimderimen birlesip fýnksıonaldyq jáne uıymdastyrýshylyq sıpattaǵy sharalar qabyldanady», - dedi Dúısenova mınıstrliktiń keńeıtilgen alqa otyrysynda.
Ekinshisi – syıymdylyǵy az úılerdi, ásirese, aýyldaǵy úılerdi qoldaý jáne damytý. Búgingi tańda osyndaı 20 úı jumys isteıdi, olardyń bazasynda arnaýly áleýmettik qyzmet kórsetýdiń jan basyna shaqqandaǵy normatıvteri synaqtan ótkiziledi. Pılottyń qorytyndysy boıynsha jańa tarıfteý júıesi daıyndalady.
Úshinshisi – quraldar nemese taýarlardyń jekelegen túrlerin kezeń-kezeńimen monetızasıalaý bastalady.
«Oblys ortalyqtary deńgeıinde qymbat jáne zamanaýı tehnıkalyq kompensatorlyq quraldarǵa teń qoljetimdilikti qamtamasyz etý úshin tehnıkalyq quraldar parkteri qurylady. Joba "Qazaqstan halqyna" qorynyń qoldaýymen iske asady», - dedi mınıstr.
Tórtinshi qadam – múgedektigi bar adamdardy qoǵamǵa tez ıntegrasıalaý úshin 12 ońaltý ortalyǵyn salý josparlanyp otyr.
«Bıyl Semeı jáne Kentaý qalalarynda ońaltý ortalyqtary paıdalanýǵa beriledi. Olar 1 shildeden bastap alǵashqy qyzmet alýshylardy qabyldaıdy», - dep málimdedi vedomstvo basshysy.
Sondaı-aq bıyl 1 aqpannan bastap Áleýmettik qyzmetter portalynyń jańa formaty júzege asady. Mınıstrdiń aıtýynsha, portalda taýarlar men qyzmetterdiń parametrleri týraly tolyq aqparat usynylady, jetkizýshilerge jáne taýar sapasyna jańa ári qatań talaptar qoıylady.
Budan bólek, múgedektigi bar adamdarǵa portal arqyly jetkizýshilerdiń is-áreketine shaǵymdaný múmkindigi beriledi.