Almaty qalasynyń óńirlik komýnıkasıalar qyzmetiniń alańynda «QazTransGazAımaq» AQ jáne tótenshe jaǵdaılar departamenti ókilderiniń qatysýymen brıfıń ótti. Spıkerler tabıǵı gazdy paıdalaný boıynsha usynystar bere otyryp, jylytý maýsymyna daıyndyq týraly aıtyp berdi, dep habarlaıdy almaty-akshamy.kz.
«QazTransGaz Aımaq» AQ Almaty óndiristik fılıaly dırektorynyń birinshi orynbasary Talǵat Burambaev óz sózinde búgingi tańda olardyń kásiporny 5 521 km joǵary, orta jáne tómen qysymdy gaz qubyrlaryn paıdalanatynyn, onyń ishinde Almaty qalasy boıynsha – 4 767 km jáne Almaty oblysy boıynsha 754 km.gaz qubyrlary qanaǵattanarlyq jaǵdaıda ekenin, jelilerdiń tozýy 36% quraıtynyn habarlady.
Ol sondaı-aq kúz-qys maýsymyna jumysqa daıyndyq boıynsha josparlanǵan jumystar 100% - ǵa aıaqtalǵanyn atap ótti.
«2023-2024 jj. kúzgi-qysqy maýsymnan oıdaǵydaı ótý jáne tutynýshylardy sapaly gazben qamtamasyz etý úshin 10 jóndeý, sondaı-aq 7 avarıalyq brıgada jumyldyryldy. Jóndeý brıgadalary qajetti materıaldarmen, qurylǵylarmen, quraldarmen, arnaıy quraldarmen kıimmen jáne tehnıkamen tolyq quramda jabdyqtalǵan», - dedi T. Burambaev.
Sonymen qatar, «Intergaz Ortalyq Azıa» gaz jelilerin paıdalaný qyzmeti gaz qubyrlaryn aralap, halyqty turmysta gazdy qaýipsiz paıdalaný erejeleri týraly habardar etedi. Sondaı-aq, apattyq ótinimderge barǵan kezde apattyq-dıspecherlik qyzmet qyzmetkerleri jadynamalar tarata otyryp, turmysta tabıǵı gazdy qaýipsiz paıdalaný jóninde nusqaýlyq beredi.
Brıfıńke «QazTransGazAımaq» AQ Almaty óndiristik fılıalynyń óndiristik-tehnıkalyq bóliminiń bastyǵy Dildábek Kúltimirov te qatysty. Onyń aıtýynsha, olar tabıǵı gaz ben kómirtegi totyǵy aǵyp ketken kezde gaz berýdi toqtatatyn gaz dabyldaryn ornatýdy usynady. Gaz jabdyǵynyń durys jumys istemeýi, tútin murjalary men ventkanaldardy ýaqtyly teksermeý jáne olarǵa qyzmet kórsetý tútin murjasynda tartýdyń bolmaýyna baılanysty kómirtegi totyǵymen ýlanýǵa ákelýi múmkin.
«QazTransGazAımaq» AQ Almaty óndiristik fılıaly óndiristik-tehnıkalyq bólimi basshysynyń orynbasary Ǵalym Beken tabıǵı gazdy paıdalaný boıynsha usynystar berdi.
«Peshterdi paıdalanýǵa óz is-áreketterin baqylamaıtyn jáne peshterdi paıdalaný erejelerin bilmeıtin balalar men adamdardy jiberýge tyıym salynady. Gazdy qyzdyratyn qurylǵyǵa óz betinshe qandaı da bir ózgerister engizýge, jylytý úshin gaz aspaptaryn paıdalanýǵa, jabyq terezelerde peshterdi paıdalanýǵa, gaz aspaptary ornatylǵan úı-jaıda uıyqtaýǵa jáne demalýǵa bolmaıdy. Gazdyń aǵyp ketýine kúdik týyndaǵan jaǵdaıda gaz qyzmetine «104» nómirine qońyraý shalý qajet, sondaı - aq páterde gazdyń ıisi bolǵan kezde barlyq gaz krandaryn dereý jaýyp, úı-jaıdy tekserip, ashyq otty paıdalanbaý, elektr quraldaryn qospaý qajet», - dep qorytyndylady Ǵalym Beken.