Almaty oblysynyń qylmystyq ister jónindegi mamandandyrylǵan aýdanaralyq soty "Qazseldenqorǵaý" mekemesiniń burynǵy basshysy Karım Kókrekbaevqa qatysty úkim shyǵardy, - dep habarlaıdy aqshamnews.kz.
Sot málimetinshe, Kókrekbaev pen onyń burynǵy orynbasary asa iri kólemde para alǵany úshin aıyptalǵan. Al úshinshi adam – JSHS dırektory asa iri kólemde para bergeni jáne urlaý maqsatynsyz múliktik zalal keltirgeni úshin jaýapqa tartylǵan.
"Sotta K. men A. qyzmet babynda júrgen kezde aldyn ala sóz baılasyp, JSHS dırektory P.-dan oryndalǵan jumystar aktilerin kedergisiz qol qoıý úshin asa iri kólemde para alǵany anyqtaldy. Sondaı-aq P. is júzinde oryndalmaǵan qurylys-montaj jumystarynyń aktilerine qol qoıýdy uıymdastyrǵan", – delingen sot habarlamasynda.
Saldarynan memleketke 1 987 827 622,63 teńge kóleminde zalal keltirilgen.
Alqabılerdiń úkimimen Kókrekbaev pen onyń burynǵy orynbasary kináli dep tanyldy.
"Sot úkimimen K. 12 jylǵa bas bostandyǵynan aıyryldy, al A. men P.-ǵa 11 jyl jaza taǵaıyndaldy. Barlyǵy ómir boıy memlekettik qyzmette laýazym atqarý quqyǵynan aıyryldy", – dep qosty sot ókilderi.
Úkim zańdy kúshine engen joq.
Eske salaıyq, Jambyl oblysynyń eks-ákimi jáne sol kezdegi "Qazselezashıta" basshysy Karım Kókrekbaevtyń ustalǵany 2022 jylǵy 27 jeltoqsanda belgili boldy. Ol kezde Antıkor Kókrekbaevtyń para alyp jatqan sátinde ustalǵanyn habarlaǵan. 2023 jylǵy mamyrda tergeý organdary bul iste fıgýranttar kásipkerlerden oryndalǵan jumystar aktilerin qol qoıý men jalpy qamqorlyq úshin jalpy somasy 396 mıllıon teńge para alǵanyn rastaǵan.