«Taza Qazaqstan» respýblıkalyq aksıasy jáne «Almaty – bizdiń ortaq úıimiz» qalalyq naýqany aıasynda sırk qyzmetkerleri Almatyny kórkeıtýge úles qosty, dep habarlaıdy almaty-akshamy.kz.
Olar Qaraǵaıly ormanyna jappaı aǵash otyrǵyzdy.
«Bizdiń Almaty qalasy óziniń shyǵý tegi men ataýyna saı almanyń otany. Kóptegen ártúrli aǵash ósedi, onyń ishinde almanyń san túrli sorty men túri bar, árıne, sonyń biri áıgili aport. Biz sırk qyzmetkerleri 8 sáýirden bastap qalamyzdyń barlyq 8 aýdanyna aǵash otyrǵyzýdy bastadyq. Búgin úlken oqıǵa. Talaı kóshet ektik, adamdar da kóp keldi. Bizdiń ortaq úıimizde - Almatyda ózimizdi bir otbasy múshesi retinde sezindik. Qalamyz odan saıyn jasyl jelekke bólenip, ádemi bola bersin», - dedi Qazmemsırk dırektorynyń orynbasary Nurlan Altaev.
Esterińizge sala keteıik, búgin «Almaty – baq qala» aksıasy barysynda 8 myńnan astam aǵash otyrǵyzyldy, onyń 4 myńnan astamy alma. «Qaraǵaıly ormany» saıabaǵynyń aýmaǵynda 500 alma jáne órik kósheti, «ALA» saıabaǵynyń aýmaǵynda 2270 kóshet jáne Boraldaı ózeniniń boıyndaǵy baqylaý alańynda 1000-ǵa jýyq kóshet otyrǵyzyldy.