Jetisý aýdanyna qarasty «Kókjıek» skveri men Serikov kóshesiniń boıynda 350 kóshet otyrǵyzyldy. Sonyń ishinde 100 alma aǵashy men 250 buta bar. İs-sharaǵa aýdan jastary da belsendi qatysty.
«Bizdiń aýdanda jyl saıyn aǵash otyrǵyzýdyń jaqsy dástúri qalyptasqan. Qala ákimdiginiń Almatynyń Alma qalasy retindegi dańqyn jandandyrýdaǵy nıeti qýantady! Biz bárimiz alma kóshetterin otyrǵyzýǵa qýana atsalystyq, - dedi aýdan turǵyny Pernegúl Amanova.
Sonymen qatar, turǵyndar úshin ınteraktıv uıymdastyryldy. Munda qatysýshylar Almaty qalasy týraly suraqtarǵa jaýap berdi.
Otyrǵyzylǵan aǵashtardy baqylaý ári kútý tolyǵymen merdigerlik uıymǵa júkteletinin eskertemiz. Jyl boıy ol aǵashtarǵa kútim jasalynady. Aǵashtardy sýǵarý, tyńaıtqysh pen magıstraldyq sheńberlerdi aerasıalaýmen qamtamasyz etedi. Osyǵan sáıkes, barlyq aǵashtar kepildikke ıe ári jyl saıyn ómir súrý deńgeıine komısıalyq tekserý júrgiziledi. Kóshetter solyp qalǵan jaǵdaıda, merdiger uıym kepildik mindettemelerin qaıtadan qamtamasyz ete otyryp, olardy jańasymen almastyrýǵa mindetti.
Esterińizge sala keteıik, aksıa barysynda 8 myńnan astam aǵash otyrǵyzyldy. Sonyń ishinde 4 myńnan astam alma aǵashy. Al «Qaraǵaı ormany» saıabaǵynyń aýmaǵynda 500 alma men órik kóshetteri, «ALA» saıabaǵynyń aýmaǵynda 2270 kóshet jáne Boraldaı ózeniniń boıyndaǵy baqylaý alańynda myńǵa jýyq kóshet otyrǵyzyldy. Aksıa «Taza Qazaqstan» respýblıkalyq naýqany jáne «Almaty – bizdiń ortaq úıimiz» qalalyq naýqany aıasynda ótýde.