Sońǵy 3 jylda muǵalimniń jalaqysy 2 eseden asa ósken
Shyǵys Qazaqstan oblysynyń halqymen kezdesken Oqý-aǵartý mınıstri Asqat Aımaǵambetov qazir muǵalimderdiń jalaqyǵa qatysty másele kótermeıtindigin málim etti, dep habarlaıdy Almaty-akshamy.kz QazAqparatqa silteme jasap.
Oqý-aǵartý mınıstri Asqat Aımaǵambetov Shyǵys Qazaqstan oblysyna jumys saparymen kelip, jergilikti halyqpen kezdesti. Sondaı-aq sapar barysynda ol Óskemen qalasyndaǵy «Jaıly mektep» jobasy aıasynda salynyp jatqan mektepter qurylysyna daıyndyq jumystarymen tanysyp, «Rahat» balabaqshasynda boldy.
«2019 jyly «Pedagog mártebesi týraly» zań qabyldandy. Bul zań kóp nárseni ózgertti. Mektep, kolej muǵalimderiniń, balabaqsha tárbıeshileriniń jáne qosymsha bilim berý salasy qyzmetkerleriniń jalaqysyn kóterý sıaqty birneshe baǵytta jumys júrgizildi. Ulttyq statısıka búrosynyń málimeti boıynsha sońǵy 3 jylda muǵalimniń jalaqysy 2 eseden asa ósken. Kelesi jyly qańtarda bilim berý qyzmetkerleri men pedagogtardyń eńbekaqysy qosymsha taǵy 25 paıyzǵa artady», - dedi Asqat Aımaǵambetov oblys halqymen kezdesýinde.
Mınıstr qazirgi ýaqytta atqarylyp jatqan jumystarǵa qysqasha toqtalyp, kópti tolǵandyrǵan saýaldarǵa da jaýap berdi.
«Búginde muǵalimder jalaqyǵa qatysty máseleni esh kótermeıdi deýge bolady. Olar tarapynan negizinen normatıvtik quqyqtyq aktiler, baǵalaý júıesi jáne sapany qamtamasyz etý týraly aıtylyp jatady. Áriptesterim men ata-analardyń qoıǵan suraqtarynyń qatty ózgergendigi meni qýantady», - dedi Oqý-aǵartý mınıstri.