Búgin «Aýyl» halyqtyq-demokratıalyq patrıottyq partıasy tóraǵasynyń orynbasary, Qazaqstan Respýblıkasynyń Prezıdenttigine kandıdat Jıgýlı Daırabaevtyń senimdi ókili Nıkolaı Arsútın Soltústik Qazaqstan oblysynyń Qyzyljar aýdany Chapaevo eldimekeninde ornalasqan «Qyzyljar sút» JSHS kásipornyna baryp, eńbek ujymymen kezdesti. Kezdesý barysynda kandıdattyń saýaldy baǵdarlamasynyń negizgi baǵyttary baıandalyp, partıanyń jumysy týraly egjeı-tegjeıli aıtyldy, dep habarlaıdy Almaty-akshamy.kz.
Jıgýlı Daırabaev óziniń baǵdarlamasynda Qazaqstan shıkizaty baı memleket bola tura, óz halqyn qoljetimdi otynmen jáne energetıkalyq resýrstarmen qamtamasyz ete almaı otyrǵandyǵyn atap ótti. Osy rette kópshilikpen kezdesken Nıkolaı Arsútın baǵdarlamada aýyl sharýashylyǵy salasyn damytýǵa erekshe den qoıylǵandyǵyna toqtaldy.
«Aýyl» partıasy aýyldyq eldi mekenderdi jańǵyrtý jónindegi uzaq merzimdi ulttyq strategıany zań deńgeıinde qabyldaýdy usynyp otyr. Ásirese, aýyl sharýashylyǵy eńbekkerleriniń mártebesin arttyrý óte mańyzdy. Qala turǵyndaryn komersıalyq ústeme baǵasyz azyq-túlik taýarlarymen qamtamasyz etý úshin megapolısterde, monoqalalarda, oblys jáne aýdan ortalyqtarynda tutyný qoǵamdary men kooperatıvter jelisin qurý jáne damytý josparlanǵan», – dedi Nıkolaı Arsútın.
Óz kezeginde kásiporyn qyzmetkerleri kandıdattyń bastamalaryn tyńdap, atalmysh jobalar júzege assa saladaǵy qordalanǵan máseleler sheshim tabaryna senim bildirdi.
Óndiris oshaǵynan keıin partıa ókilderi Petropavl qalasyndaǵy Sábıt Muqanov atyndaǵy kitaphanada saılaýshylarmen kezdesý ótkizdi. Jıynda kandıdattyń aldaǵy ýaqytqa josparlary, «Aýyl» partıasynyń jobalary tóńireginde áńgime qozǵalyp, jurtshylyqtyń suraqtaryna jaýap berildi.