TikTok messendjerinde Qazaqstanǵa kele jatqan tropıkalyq daýyl týraly vıdeo tarap júr.
Onda 2024 jylǵy 9-10 aqpanda kúshi saǵatyna 100 km-ge deıin jetetin jel soǵady delingen. «Qazgıdromet» RMK bul aqparatqa qatysty túsinikteme berdi, dep habarlaıdy Almaty-akshamy.kz Stopfake.kz-ke silteme jasap.
«Qazgıdromet» RMK habarlaýynsha, vıdeoda birqatar dálsizdikter bar.
«Rolıkte aıtylyp otyrǵan sıklon Qazaqstan aýmaǵynda paıda bolmaıdy, ol Qazaqstanǵa Skandınavıa aýdandarynan aýysyp keledi jáne 7 aqpanda el aýmaǵynyń basym bóligin qamtıtyn bolady. Jeldiń kúshine keletin bolsaq, vıdeoda aıtylǵan 100 km/saǵ-ty m/s aınaldyrǵanda 27-28 m/s shyǵady. Sondaı-aq «Qazgıdromet» RMK málimetinshe, 6 aqpanda daýyldy eskertý taratyldy. Oǵan sáıkes, 2024 jylǵy 06 aqpan saǵat 21:00-den 09 aqpan saǵat 21:00 deıin № 10 stıhıalyq metereologıalyq qubylys oryn alady, ıaǵnı jeldiń kúshi 30 m/s deıin kúsheıedi. Óńirler: Aqmola oblysy, Aqtóbe oblysy, Jambyl oblysy, Qostanaı oblysy, Pavlodar oblysy, Soltústik Qazaqstan oblysy, Túrkistan oblysy. Daýyldy eskertýge sáıkes, 7-9 aqpanda kúndiz Qazaqstannyń basym bóliginde jyldamdyǵy 23-28 m/s jel soǵady, keı jerlerde ekpini 30 m/s jetedi dep boljanýda, odan ári sıklon Qazaqstannan tys jerlerge aýysady», – delingen baspasóz qyzmetiniń habarlamasynda.
«Qazgıdromet» RMK Qazaqstan turǵyndary men qonaqtaryn resmı aqparatqa ǵana senýge shaqyrady. Tıisti aqparat Tótenshe jaǵdaılar departamentiniń 112 Biryńǵaı kezekshi-dıspecherlik qyzmetinen taralady, daýyldy eskertýler saıtynda jáne DARMEN mobıldi qosymshasynda jarıalanady.