Premer-Mınıstrdiń orynbasary Úkimettiń keńeıtilgen otyrysynan keıingi brıfıńte mindetti áleýmettik medısınalyq saqtandyrý júıesine qatysty saýalǵa jaýap berdi, dep habarlaıdy almaty-akshamy.kz.
«Medısınalyq saqtandyrý júıesi álemdegi klıent úshin aqsha ustanymynyń júzege asyrylýyn qamtamasyz etetin jalǵyz júıe sanalady. Eger durys jolǵa qoısa, onda árbir emhana men aýrýhana adamdardyń ózderine kelip, sapaly kómek alýyna múddeli bolar edi. Iá, bizde problema bar. Adamdar sapaly kómek alýy úshin bul júıeni ózgertýimiz qajet», - dedi Úkimet basshysynyń orynbasary.
Aıta keteıik, Búgin Úkimettiń keńeıtilgen otyrysynda Memleket basshysy Qasym-Jomart Toqaev MÁMS júıesin synǵa alǵan bolatyn.
Prezıdentiń aıtýynsha, mindetti áleýmettik medısınalyq saqtandyrý júıesiniń iske qosylǵanyna 5 jyl boldy. Sodan beri bul salanyń búdjeti eki ese artty. Bıyl 2,6 trıllıon teńge bólinedi.
«Alaıda, medısınalyq kómektiń sapasy aıtarlyqtaı jaqsardy dep aıtýǵa bolmaıdy. Kóptegen qyzmet áli de qoljetimdi emes. Budan bólek, kóp jaǵdaıda resýrstar tıimsiz jumsalady. Sonyń saldarynan bul salaǵa qosymsha qarjy bólip, búdjetke salmaq salýǵa týra keledi. Úkimet medısınalyq saqtandyrý júıesiniń qyzmetin qatań baqylaýǵa alýy kerek. Bul júıe qarapaıym ári túsinikti bolýǵa tıis», - dedi Qasym-Jomart Toqaev.