"Tobylǵy jarǵan" amaly keldi. 2-3 kúnge sozylǵan sýyq jel soǵady. Osy kezde túz aǵashy – tobylǵy búrshik jaryp, ósimdikter tamyr jaıady. Ary qaraı shýaqty kóktemniń shyraıy kire bastaıdy
Sáýir aıynyń sońǵy kúnderi sýyq jel soǵyp, ol 2-3 kúnge sozylady. Osy kezde tobylǵy aǵashy búrshik jaryp, ósimdikter tamyr jaıady. Jerge kók shyǵady. Burynǵy kónekóz qarıalar tabıǵattyń bul qubylysyn «Tobylǵy jarǵan» dep ataǵan...
«Sáýir aıy – jaýyn aıy» dep beker aıtpasa kerek, aıdyń jaýyn-shashyny mol bolyp tur. Ótken paıymymyzda: «...Sáýir aıynyń 25-inen «Sáýir» degen amal bastalady. Naızaǵaı oınap, jańbyr jaýyp, qatty jel turady...» degen bolatynbyz. Sondaı-aq, bul amaldyń jaqsylyǵyna baqsa, alty kúnge, jaqsylyǵyna baqpasa, alpys kúnge sozylatyn qaýipti ekenin, «Qyryq sáýirik, bir myrza» dep atalǵan qaıǵyly ańyz osy amaldyń ishinde ekenin eskertkenbiz. Boljamymyz aına-qatesiz keldi. Úzdiksiz jaýyn-shashyn bolyp, Alataý bókterlerinde jańbyrdyń sońy qarǵa ulasty.
Almatyda 25 sáýirde nóser jaýynnyń saldarynan 50-den astam ýchaske sý astynda qaldy. Jergilikti jerlerde komýnaldyq qyzmetter men merdigerlik uıymdar jedel jumys isteýge májbúr boldy. Osy oraıda, qala kásiporyndary men mekeme jetekshileriniń qalanyń bas basylymy – «Almaty aqshamy» gazetin oqyp otyrǵany abzal der edik.
Joǵaryda aıtqanymyzdaı, sáýir aıynyń sońǵy kúnderi sýyq jel soǵyp, ol 2-3 kúnge sozylady. Bul «tobylǵynyń búrshik jarýy». Keńshilik aqyn (Myrzabekov) óziniń «Tobylǵy saıǵa barǵanda» degen óleńinde:
«Dúr etip lezde, búr jarǵan kezde dúzgen, tal,
Tobylǵy saıǵa toryńdy saılap qyzben bar.
Qolań shaǵyr men qolamta kúlgin kókpektiń
Arasynda arshyn tuıaqtar tıgen izder bar.
Tuıaqtar teýip tastaǵan taspa topyraq
Qıaqtar kómip, qańqasy keýip jatyp ap,
Shańqaı túste shekesi shyp-shyp qyzǵanda
Qalqalaıdy kep qyzǵanshaq túıejapyraq...», – dep jyrlapty. «Tobylǵy jarǵan» amalynyń bar bolmysy osy 8 shýmaqqa syıyp tur.
Aspan denelerinde úzdiksiz qozǵalys oryn alýda. Bul osy aı bitkenshe jaýyn-shashynnyń bola beretinin ańǵartsa kerek. Ótkende týǵan jańa aıdy kórgenimiz bar. Basy ǵana qyltıyp, shalqalap jatyr eken. Sáýirdiń qubylmaly, sharýaǵa qolaısyz bolatynyn ol da ańǵartyp jatqandaı.
Qazir Almatyda jemis aǵashtarynyń bári gúldep, túınek sala bastady.
«Bozqaraǵan kórdiń be, bozqaraǵan,
Bozqaraǵan butaǵyn qozǵama, adam!
Bozqaraǵan ishinen bozbalalar
Boıjetkenge bozaryp kóz qadaǵan...», – dep qaıran Muqaǵalı jyrlaǵan bozqaraǵan gúldep, Almatynyń sánin kirgizip tur.
Kún raıy buzyla qalǵan jaǵdaıda olardyń qaýipsizdigin oılastyrý kerek. Keıbir baǵbandar baq ishinde tútindik salǵan. Tútinniń jylýymen jemis aǵashtaryn saqtap qalǵan.