22 jastaǵy qazaq balasy AQSH-ta eń alyp áýe kompanıalardyń birin baǵyndyryp júr
Almaty oblysynan shyqqan Dáýren Sábıtov nebári 22 jasynda Amerıkanyń eń alyp áýe kompanıalarynyń birinde ushqysh-ınstrýktor bolyp jumys isteıdi, dep habarlaıdy Almaty-akshamy.kz Almaty-tv saıtyna silteme jasap.
Dáýren 1999 jyly qazaqtyń qarapaıym otbasynda týǵan. Bala kezinen ushqysh bolýdy armandaǵan ol Almatydaǵy QTL-dy bitirip, birden Amerıkaǵa jol tartady.
«2017 jyly mektepte birge oqyǵan synyptastarymmen bir ýaqytta AQSH-taǵy Kalıfornıa shtatynyń San-Mateo qalasyna keldik. Dostarymnyń arasynda men ǵana avıasıany tańdadym. Onyń óz tarıhy bar», – dep ol áńgimesin alystan bastady.
Dáýren Sábıtovtiń ákesi de ushqysh eken. Onyń osy mamandyqty tańdaýyna ákesi zor yqpal etken.
«Ákem kóp jyl boıy avıasıa salasynda jumys istep júr. 5 jasymda alǵash ret óziniń jumys ornyna aparǵany esimnen ketpeıdi. Óz kózimmen alyp ushaqtardy, olardyń arnaıy daıyndyqtan ótý prosesin sol kezde birinshi ret kórsem kerek. Tipti, ákemmen birneshe ret ushqan kezderim de boldy. Ushqyshtardyń kabınasynan ǵana baıqaýǵa bolatyn áýedegi kórinis, kúnniń shyǵýy men batýy meni birden baýrap aldy. Qysqa qaıyrǵanda, bolashaqta kim bolatynymdy 5 jasymda-aq bildim ǵoı», – deıdi ol.
Qazir ol Standord Flying arnaıy oqý ornynda bilimin jetildirip, joǵary sanatty sertıfıkat alýǵa daıyndalyp júr.
Onyń aıtýynsha, Amerıkadaǵy ushqyshtardy daıarlaıtyn oqý oryndarynyń baǵasy Qazaqstanmen birdeı.
«Bireý sener, bireý senbes, biraq AQSH-ta ushqyshtardy daıyndaıtyn oryndar Qazaqstandaǵy akademıalardan arzanyraq. Avıasıasy eń myqty damyǵan el bolsa da, ushqyshtar úshin bar jaǵdaıdy jasaǵan», – deıdi ol.
2021 jyly Dáýren bala kezdegi armanyn oryndap, Amerıkanyń eń ataqty áýe kompanıalarynyń birine jumysqa turady. Qazir ol California Airways korporasıasynda ushqysh-ınstrýktor bolyp jumys istep júr.
Sonymen qatar Dáýren jeke tapsyrys qabyldap, charterlik reısterdiń de tizginin ustaıdy.
AQSH-ta ushqyshtyń dárejesin mıl ne shaqyrym emes, saǵat anyqtaıdy eken. Pılot esebinde Dáýren 900 saǵat ushqan. Bul jumysqa shyqqan ýaqyt emes, áýedegi esep. Basqa elderde 900 saǵat ushý úshin 10-15 jylyńdy sarp etýiń múmkin, biraq tek Amerıkada emes.
Keıipkerimiz Qazaqstandaǵy avıasıa jáne áýe kompanıalary týrasynda da oı bólisti. Onyń aıtýynsha, elde áýe bıletiniń baǵasy tym qymbat.
Jas ushqysh Qazaqstanǵa qashan oralatynyn da aıtyp berdi. Ol elge kelip, jas stýdenttermen jumys istegisi keletinin alǵa tartty.
«5-6 jyldan keıin elge qaıtyp, Amerıkada jınaǵan tájirıbemdi Qazaqstan avıasıasynyń damýyna arnasam deımin. Oqýdy endi bitirip, ushaq ekıpajyna aıaq basa almaı júrgen jastarǵa baǵyt kórsetýdi armandap júrmin», – deıdi ol.