1 qazan kúni Qazaqstanda dástúrli formattaǵy halyq sanaǵy bastalady
Ulttyq halyq sanaǵy respýblıka boıynsha on jylda bir ret ótkiziledi. Bıylǵy sanaq elimiz táýelsizdik alǵaly beri úshinshi ret ótkizilip otyr, dep habarlaıdy Almaty-akshamy.kz QazAqparatqa silteme jasap.
Bıylǵy sanaqtyń basty jańashylyqtarynyń biri – sanaqtyń dástúrli jáne onlaın formatta ótýi boldy. 1 qyrkúıek pen 15 qazan aralyǵynda onlaın rejımde ózdiginen saýalnama paraqtaryn toltyrý múmkindigi bolady. Júıe táýligine 24 saǵat qoljetimdi bolady, respondentter sanaqqa qatysý úshin ózine yńǵaıly ýaqytty tańdaı alady, saıtta blank toltyrýdy toqtatyp, keıinnen jalǵastyra alady.
Odan basqa, Egov platformasynda elektrondyq sıfrlyq qoltańba arqyly jáne Aitu mobıldi qosymshasy arqyly, sanaq.gov.kz saıty arqyly sanaqtan ótýge bolady. Sanaq.gov.kz júıesi táýligine 24 saǵat qoljetimdi bolady.
Al dástúrli ulttyq sanaq onlaın rejımde sanaqtan ótpegen turǵyndar úshin 1-30 qazan aralyǵynda ótedi. Dástúrli sanaqtyń jańashylyqtary – ıntervúerdiń elektrondy planshetterdi paıdalanýy, zamanaýı sıfrlyq tehnologıanyń enýi men úrdisterdiń avtomattanýy bolmaq. Bul derekter sapasyna adam faktorynyń yqpalyn azaıtady jáne derekterdiń bazaǵa tolyq enýine múmkindik beredi.
Halyq arasyndaǵy saýalnama júrgizetin ıntervúerler úshin mindetti talap – jeke basyn kýálandyratyn qujat pen beıdjdiń bolýy, sýreti, aty-jóni, berilgen kúni, qoldaný merzimi aýmaqtyq statısıka organynyń qolymen jáne mórimen rastalǵan bolýy tıis. Halyq sanaǵy belgisi bar kók tústi sharf pen portfel bolýy kerek.
Sanaq barysynda respýblıka turǵyndary úshin 1446 biryńǵaı koll-ortalyǵy jumys isteıdi. Oǵan stasıonarlyq jáne uıaly telefonnan qońyraý shalý tegin. Sońǵy málimetter boıynsha, sanaqtan onlaın ótkender qatary 6 mıllıonnan asty. Túrkistan oblysy kósh bastap tur. Halyq sanaǵy arqyly halyqtyń turmysy, áleýmettik jaǵdaıy týraly mańyzdy málimetterdi jınaýǵa bolady.