Qandas mártebesin aldy.
Ústimizdegi jyly elge oralǵan qazaqtardyń sany artty. Jyl basynan beri Qazaqstanǵa 18 myńǵa jýyq qandas elde oralǵan, dep habarlaıdy Almaty-akshamy.kz.
«2022 jylǵy 1 jeltoqsandaǵy jaǵdaı boıynsha, 17 888 etnıkalyq qazaq tarıhı otanymen tabysyp, qandas mártebesin aldy. Jalpy, 1991 jyldan beri respýblıkaǵa 1 mıllıon 105,7 myń etnıkalyq qazaq oraldy», - delingen Eńbekmıni baspasóz qyzmetiniń habarlamasynda.
Osy jyldyń basynan bastap Qazaqstanǵa oralǵan qandastardyń jartysynan kóbi (63,5%) Ózbekstannan, 9,9% – Reseıden, 9,1% – Túrkimenstannan, 8,6% – QHR-dan, 4,9% – Mońǵolıadan, 4% – basqa elderden kelgen.
Elge oralǵan etnıkalyq qazaqtar negizinen Almaty (27,1%), Mańǵystaý (17,7%), Túrkistan (8,3%) jáne Jambyl (6,1%) oblystaryna, sondaı-aq Almaty (5,5%), Astana (9,1%) jáne Shymkent (6,6%) qalalaryna qonystandy.
Bıylǵy jyldyń 1 jeltoqsanyndaǵy jaǵdaı boıynsha, eńbekke qabiletti jastaǵy etnıkalyq qonys aýdarýshylar sany 59,4%-dy, eńbekke qabiletti jastan kishiler 26,9%-dy jáne zeınetkerler 13,7%-dy quraıdy.
Eńbekke qabiletti jastaǵy qandastardyń ishinen bilim deńgeıi boıynsha 20%-y - joǵary bilimdi, 39,4%-y - orta kásibı bilimdi, 38,9%-y - jalpy orta bilimdi jáne 1,7%-ynyń bilimi joq.