Almatyda qazaqtyń bulbul ánshisi Bıbigúl Tólegenovanyń 95 jyldyq mereıtoıy atap ótildi
Qazaq óneriniń qara shańyraǵy Jambyl atyndaǵy Qazaq memlekettik akademıalyq fılarmonıa sahnasynda taǵy da bir aıtýly mereıtoı keshi ótti. Óner ordasynyń 89-jyldyq tarıhynda esimderi altyn árippen jazylǵan dara tulǵalar qyzmet atqarǵan. Sonyń biri de, biregeıi Qazaqstan jáne KSRO halyq ártisi, Memlekettik syılyqtyń laýreaty, Sosıalısik Eńbek Eri, bulbul ánshi Bıbigúl Ahmetqyzy Tólegenova. Qazaqtyń bulbuly kıeli shańyraqta ótken óziniń óner jolynda fılarmonıa án repertýarynyń baıýy men damýyna eseli úlesin qosyp, shyǵarmashylyqtyń shyńyna shyǵyp, memlekettik marapattyń kóbine qol jetkizgen. Ǵıbratty ǵumyr ıesi, ult maqtanyshy Bıbigúl Tólegenova bıyl 95 jasqa tolady. Mereıli toı qarsańynda qara shańyraqta ánshiniń shyǵarmashylyǵyna arnap, N.Tilendıev atyndaǵy akademıalyq fólklorly-etnografıalyq «Otyrar sazy» orkestriniń Bıbigúl Tólegenovanyń shyǵarmashylyǵyna arnalǵan konserti ótti.
Qazaqstannyń eńbek sińirgen qaıratkeri, fılarmonıa dırektory Abdýalıev Aqan Jylqyshybaıuly:
-«Osy jeltoqsan aıynda qazaq án óneriniń bulbuly Bıbigúl Tólegenova apamyz úlken 95 degen, ǵasyrmen qurdas jasqa keledi. Ol kisimen áńgimelesken kezde fılarmonıada apamyz on bes jylǵa jýyq qyzmet atqarǵanyn, jáne óziniń aıtýynsha KSRO Halyq ártisi, Qazaqstan Halyq ártisi, Sosıalısik Eńbek eri odan basqa da marapattary bar, sonyń bárin osy fılarmonıa qabyrǵasynda júrgen kezde alǵanyn aıtady. Sondyqtan da, bul mereıtoıdy mindetti túrde atap ótýdi jón kórdik. Jáne de atap ótýde bizdegi iri ujymdardyń ishinen Nurǵısa Tilendıev atyndaǵy "Otyrar sazy" orkestrine toqtaldyq. Sebebi, Nurǵısa Tilendıev pen Bıbigúl Ahmetqyzy bir úıdiń úshinshi-tórtinshi qabatynda kórshi turǵan. Ekeýi ónerde syrlas bolǵan. Sondyqtan da búgingi keshti Otyrar sazymen ótkizýdi jón kórdik».
N.Tilendıev atyndaǵy akademıalyq fólklorly-etnografıalyq «Otyrar sazy» orkestriniń Kórkemdik jetekshisi jáne bas dırıjeri, Qazaqstannyń eńbek sińirgen qaıratkeri «Parasat» jáne «Qurmet» ordenderiniń kavaleri Dinzýhra Tilendıeva:
- «Búgingi tolyq konsert jıyrma shyǵarmadan turady. Onyń kóbisi Bıbigúl Ahmetqyzynyń repertýarynan alynǵan ánder. Biz ol kisimen bir úıde turdyq. Ákem Bıbigúl Ahmetqyzymen ónerde birge kóp jumys istedi, ákemniń kóptegen ánderin birinshi bolyp oryndady. Onyń ishinde "Kel erkem Alataýyma", "Jan jarym", "Jan sáýlem" ánderi bar. Konsertke biz biraz ýaqyt daıyndaldyq. Búgingi konserttiń baǵdarlamasyn daıyndaýda da soǵan qarap oılastyrdym. Baǵdarlamadaǵy shyǵarmalardyń kópshiligin orkestrge ákem ózi jazyp ketken, jáne odan bólek Bıbigúl Ahmetqyzynyń tikeleı shákirti bolmasa da, izin basyp kele jatqan jańa ánshiler jańa kompozıtorlardyń ánderi de oryndaldy».
Konserttik baǵdarlamada Qazaqstannyń eńbek sińirgen qaıratkeri, «Qurmet» ordeniniń kavaleri Jalǵasbek Begendikov pen Halyqaralyq konkýrstardyń laýreaty Ábilqaıyrhan Beısekovtiń dırıjerlik etýimen Bıbigúl Tólegenovanyń repertýaryndaǵy Halyq áni «Gaýhartas», «Jan jarym», «Mama» atty úzdik shyǵarmalary men bar qazaqqa tanymal Evgenıı Brýsılovskııdiń «Qyz Jibek» operasynan «Gákký» t.b. ánderi oryndaldy. Keshte Qazaqstannyń eńbek sińirgen qaıratkeri, «Qurmet» ordeniniń kavaleri Gúlzat Dáýirbaeva, «Eren eńbegi úshin» medaliniń ıegeri Aıgerim Sháripbek, Halyqaralyq konkýrstardyń laýreattary Farhat Kýbıev, Nurǵalym Amanbaı, Aıajan Qýanyshalıeva, Aıdos Jabaǵın, Juldyz Baıjuma óner kórsetti. Toqsannyń torqasyna shyqqan tulǵa mereıtoılyq konsertte kórermender qatarynan tabylyp, ózine kórsetilgen syı-qurmetke rızashylyǵyn bildirdi.
Qazaqstan jáne KSRO halyq ártisi, Memlekettik syılyqtyń laýreaty, Sosıalısik Eńbek Eri, bulbul ánshi Bıbigúl Ahmetqyzy Tólegenova:
-«Búgin men baqytty adammyn. Óıtkeni, sizder menimen birge, meniń 95 jyldyǵymdy toılaýǵa kelip otyrsyzdar. Árıne, bul jasqa jetýdiń ózi jeńil emes. Talaı qıynshylyqtar da boldy. Sizderge aıtarym, elimiz aman bolsyn, tynyshtyq bolsyn. Aspanymyz ashyq bolyp, syrttaǵy jaýdan saqtasyn. Qazaq degen – keń halyq qoı. Halqymyz aman bolsyn, tynyshtyq bolsa, qolymyzdan bári keledi. Úlkenderge osyndaı qurmet, jastarǵa jol bolsyn»– dep elge aq batasyn berdi.
Qazaq óneriniń tarıhynda ult maqtanyshtaryn únemi jadymyzda ustap, mádenı mura dep bilý – mádenı mekemeniń basty ustanymy. Osy maqsatta fılarmonıa qabyrǵasynda aldaǵy ýaqytta da keremet keshter jalǵasyn tappaq.