Qasym-Jomart Toqaevqa elimizdegi áleýmet jáne eńbek salalaryn damytý boıynsha atqarylyp jatqan jumystardyń esebi men aldaǵy jospary jóninde aqparat berildi, dep habarlaıdy aqshamnews.kz
Memleket basshysyna ataýly áleýmettik kómek kórsetýdiń jańa tásilderi usynyldy. Bul sharalar áleýmettik qoldaýdyń tıimdiligin arttyryp, kómektiń tıisti azamattarǵa dál jetýin kózdeıdi.
Svetlana Jaqypovanyń aıtýynsha, 2025 jyldyń 1 qańtarynan bastap Arnaýly áleýmettik qyzmet kórsetý ortalyqtarynda jan basyna shaqqandaǵy qarjylandyrýdy lısenzıalaý júıesi engiziledi. Bul maqsatta kásibı standarttar men oqytý modýlderi ázirlengen. 2030 jylǵa deıingi ınklúzıvti saıasat tujyrymdamasy aıasynda múgedektiktiń áleýmettik-quqyqtyq qorǵaý modeline kóshý engizilip jatyr.
Prezıdentke halyqty jumyspen qamtýǵa baǵyttalǵan sharalar jóninde baıandaldy. Mınıstrdiń aıtýynsha, bıyl 804 myńnan astam adam jumysqa ornalasty. Olardyń ishinde 200 myńnan astamy jastar. Al 9 myńǵa jýyq azamat, sonyń ishinde múmkindigi shekteýli azamattar men erekshe qajettilikteri bar balalardyń ata-analary bıznes ıdeıalaryn júzege asyrý úshin grant aldy.
Qasym-Jomart Toqaevqa sapaly josparlaý men memlekettik ınvestısıalardyń tıimdiligin arttyrý maqsatynda ázirlengen «Jobalardyń ınovasıalyq navıgatory» qanatqaqty jobasy týraly baıandaldy. Atalǵan júıe mamandarǵa degen suranysty taldap, boljaıdy, sondaı-aq jobalardyń tıimdiligine monıtorıń jasap, sapasyn qadaǵalaıdy jáne úılestirýdi qamtamasyz etedi. Platforma qazirdiń ózinde jalpy quny 33 trıllıon teńge bolatyn 755 ınvestısıalyq jobany súıemeldep otyr. Ony júzege asyrý aıasynda 150 myńǵa deıin jumys ornyn qurý josparlanǵan. Navıgator qajetti eńbek resýrstary joq jaýapsyz merdigerlerdi anyqtaýǵa da múmkindik beredi.
Mınıstr eńbek janjaldarynyń aldyn alýǵa kómektesetin Eńbek táýekelderiniń sıfrlyq kartasynyń jumysyna toqtaldy.
Qasym-Jomart Toqaev áleýmettik saıasatty jetildirý jáne áleýmet jáne eńbek salalaryndaǵy sharalardyń tıimdiligin arttyrý jóninde birqatar tapsyrma berdi.