Qazaqstannyń Energetıka mınıstri Almasadam Sátqalıev elimizde uzaq ýaqyt boıy paıdalanylmaǵan jáne kelisimsharttyq mindettemelerin oryndamaǵan jer qoınaýyn paıdalanýshylardan talap etilgen aıyppuldar týraly aıtty, dep habarlaıdy aqshamnews.kz
2022 jyldan bastap mınıstrlik 52 kelisimshartty buzǵan. Bul kelisimder keıin aýksıon arqyly qaıta satylymǵa shyǵarylady. Energetıka mınıstriniń aıtýynsha, qazirgi tańda toǵyz kelisim boıynsha 1,9 mıllıard teńge kólemindegi qaryz ótelgen.
«2022 jylǵy kelisimsharttar boıynsha 158 eskertý jasalyp, jalpy somasy 12 mıllıard teńge boldy, onyń 5,6 mıllıard teńgesi óteldi. Al 2023 jylǵy kelisimsharttar boıynsha 141 eskertý jasaldy, jalpy somasy 14 mıllıard teńge boldy, búgingi kúni 2,4 mıllıard teńge óteldi», — dedi Almasadam Sátqalıev úkimettik saǵatta.
2024 jyldyń 1 qarashasyna qaraı Qazaqstanda 315 munaı-gaz kelisimsharty kúshinde tur.
«2020 jyldan bastap jer qoınaýyn paıdalanýǵa quqyq berý júıesi tolyq avtomattandyryldy. Ol elektrondy aýksıon arqyly júzege asyrylady. Bul proses ashyq ári aıqyn etedi. Osy ýaqyt ishinde toǵyz elektrondy aýksıon ótkizildi. Onyń barysynda 110 jer ýchaskesi satylyp, búdjetke 49,5 mıllıard teńge kóleminde qol qoıý bonýsy tólenip, geologıalyq barlaý jumystaryn júrgizýge 443 mıllıon dollar ınvestısıa tartyldy», — dep qosty mınıstr.
Kelesi aýksıon 27 qarashada toǵyz ýchaske boıynsha ótkizilýi josparlanǵan.