Almatyda Bıbigúl Tólegenovanyń 95 jyldyq mereıtoıyna arnalǵan konsert ótti
Almatynyń Respýblıka Saraıynda opera jáne kıno óneriniń tiri ańyzy, halyq artısi ári ulaǵatty ustaz Bıbigúl Tólegenovanyń 95 jyldyq mereıtoıyna arnalǵan saltanatty konsert ótti. Óner sahnasynda 75 jyl ǵumyryn arnaǵan dara tulǵa – Qazaqstannyń rýhanı mádenıetiniń sımvolyna aınalǵan óner ıesi, dep habarlaıdy aqshamnews.kz
Saltanatty keshtiń shymyldyǵyn Aleksandr Belákov jetekshilik etken estradalyq-sımfonıalyq orkestr ashty. Olar qazaqtyń uly kompozıtory Shámshi Qaldaıaqovtyń máńgilik shyǵarmalaryna negizdelgen ývertúrany oryndap, keshtiń merekelik rýhyn aıshyqtady. Osydan keıin sahna tórine tanymal vıolonchelıs Baqytjan Oktábr shyǵyp, qazaqtyń halyq áni «Iapýraıdy» názik únmen áýelete oryndap, tyńdarmandardyń júregin tebirentti.
Konsertte Qazaqstannyń mýzykalyq sahnasyndaǵy tanymal ónerpazdar – «Astana Opera» jáne Abaı atyndaǵy Qazaq ulttyq opera jáne balet teatrynyń solıseri, sondaı-aq halyqaralyq baıqaýlardyń laýreattary óner kórsetti. Damır Sadýaqasov, Dana Talaspekova, Álıhan Zeınýlla, Jandarbek Erkinbaev, Balýan Berkenov, Zarına Altynbaeva, Oleg Tatamırov, Rasýl Jarmaǵambetov jáne Taır Táji syndy talanttar Mosart, Jorj Bıze, Djoakkıno Rossını jáne Aleksandr Zasepınniń operalyq týyndylarynan úzindiler oryndap, kórermenderdi óner áleminiń bıigine samǵata tústi. Al «Saltanat» ansambliniń oryndaýyndaǵy «Shashý» bıi merekelik keshke erekshe kórik berdi.
Kesh barysynda Latıf Hamıdıdiń ataqty «Bulbul» romansy da oryndaldy. Bul shyǵarmanyń arqasynda Bıbigúl Ahmetqyzy «qazaqtyń bulbuly» ataǵyn ıelenip, tek Qazaqstanda ǵana emes, álemniń kóptegen elderinde tanylǵan edi. Osy joly bulbul ánin Qazaqstannyń eńbek sińirgen qaıratkeri Tolqyn Zabırova oryndap, kórermenderge erekshe áser syılady.
Konserttiń sharyqtaý shegi retinde, merekeniń basty keıipkeri – Bıbigúl Ahmetqyzy sahnaǵa shyǵyp, qatysýshylarmen birge óner kórsetti. Ol Djýzeppe Verdıdiń «Travıata» operasynan «Zastolnaıa» arıasyn jáne barshaǵa tanys, júrekke jyly «Kóktem ánin» shyrqady.
Aıta keteıik, mereıtoı qarsańynda, 16 jeltoqsan kúni Almaty ákimi Erbolat Dosaev Memleket basshysy Qasym-Jomart Toqaevtyń atynan Bıbigúl Tólegenovany 95 jyldyq mereıtoıymen arnaıy quttyqtap, onyń ult mádenıetin damytýdaǵy ólsheýsiz eńbegin atap ótken bolatyn.
Bul kesh qazaq óneriniń bıik shyńyndaǵy tulǵanyń shyǵarmashylyǵyna degen qurmet pen rızashylyqtyń jarqyn kórinisi boldy.