Ústimizdegi jyl Almaty turǵyndary úshin erekshe jetistiktermen jáne oń ózgeristermen este qaldy. Qalanyń ınfraqurylymy jaqsaryp, medısınalyq jáne áleýmettik salalarda jańa bastamalar júzege asyryldy. Almatynyń tynysy ashylyp, qala turǵyndary jaıly ómir súrýge múmkindik aldy. Bul týraly qala turǵyndary ne deıdi?
Serik QÝANYSH, kásipker:
- Bıyl Kóktóbe telemunarasynyń jaryqtandyrylýy erekshe áser qaldyrdy. Túngi Almatynyń kórkine kórik qosyp qana qoımaı, qalanyń týrısik tartymdylyǵyn arttyrdy. Munaranyń jańa medıafasady túrli tústermen kómkerilip, qalanyń sımvolyna aınaldy desem artyq aıtpaımyn. Qazir kópshilik bul jerge arnaıy baryp, sýretke túsýdi ádetke aınaldyrdy. Áleýmettik jelide Kóktóbe fonynda jasalǵan fotolar kóptep jarıalanyp jatyr. Mundaı ózgerister qalamyzdyń kelbetin jańartyp, Almatynyń zamanaýı megapolıs ekenin taǵy bir dáleldedi.
Bekzat SAHIDAVLETOVA, pedagog:
– Bıyl Almatyda jańa mektepterdiń qurylysy qolǵa alyndy. Bul mektepter oqýshy sany kóp aýdandarda salynyp jatyr. Nátıjesinde balalardyń jolǵa ketetin ýaqyty qysqaryp, bilim sapasyna oń áserin tıgizedi dep senemin. Sonymen qatar, jańa mektepter zamanaýı jabdyqtarmen qamtylyp, pedagogıkalyq kadrlarǵa qosymsha jumys oryndary ashylady. Munyń barlyǵy bilim berý júıesiniń damýyna serpin beredi.
2024 jyly Almatyda kóptegen mańyzdy bastamalar júzege asty. Qaladaǵy ózgerister qala turǵyndarynyń ómirin jeńildetip, megapolıstiń zamanaýı kelbetin qalyptastyrýda. Turǵyndar bul jetistikterdi joǵary baǵalap, Almatynyń damýyna oń kózqaras bildirdi.
Áýelaı ÁRİPQYZY, turǵyn: JOL QATYNASY JAQSARDY
Bul jyl qalaǵa qatynaıtyn avtobýstardyń kóbeıgenimen este qaldy. Kezinde qaladan páterge qol jetkizý qıyn bolǵandyqtan, balalarym Almatydan tysqary turyp jatyr. Bir qyzym Esik qalasynda, eki ulym Talǵarda turady. Báriniń de jumys orny - Almatyda.
Buryndary olar jıi taksıge otyratyn. 2-3 jyl boldy, olar "Ońaı" tólemjúıesi qosylǵan avtobýstarmen júredi. Qalaaralyq jol qatynasyn júıeli túrde qolǵa alǵany úshin Almaty ákimdigine alǵysymyzdy aıtamyz. Qanshama adam qarjysyn únemdeýde. Bul - eleýli kómek.
Esik pen Talǵarǵa "ońaı" tólemmen avtobýstar erterek qatynaǵanymen, bul júıemen qoǵamdyq kólikter Qaskeleńge keshteý qosyldy. Ana-júrek alańdaǵysh keledi, kenje qyzym Qaskeleńniń ar jaǵynda turatyn. Onyń da jumysy Almatyda. Qatynaý qıynǵa soqqan. Bir jyldan asty, bul jaqqa da "ońaımen" avtobýstar júre bastaǵan. 230-baǵyttyq avtobýs qatynaı bastady. Biraq, avtobýs sany az boldy. Bıyl, jyl sońyna taman, Qaskeleń arqyly júretin 254, 257-baǵyttyq avtobýstar qosylyp, jaǵdaı jaqsardy. Qyzym da máz.
"Jol muraty - jetý" degendeı, almatylyq basshylyqqa aıtar alǵysymyz mol.
"Almaty aglomerasıasy" baǵdarlamasy aıasynda qoǵamdyq kólikterdiń kóbeıýi qýantady. Bul da bolsa, bıylǵy jetistik. Bul jyl ózi qalaralyq qoǵamdyq kólikter qatarynyń qaýyrt artýymen este qalyp otyr. Láıim, jol qatynasy jaqsara bersin.
Jańyl ÁPETOVA, Halyqaralyq "Janashyr" qoǵamdyq qorynyń prezıdenti: HALYQTYŃ QAÝİPSİZDİGİ MAŃYZDY
– Almaty kóshelerinde kólikter júrisin baqylaıtyn kameralar kóbeıdi. Halyqtyń bas-amandyǵy mańyzdy. Bul júrgizýshilerdiń jol erejesin saqtaýǵa jaqsy negiz boldy. Kósheler keńeıtildi. Ádemi, zamanaýı ǵımarttar boı kóterýde.
Qalanyń bos jerlerine kóp jemis aǵashtary otyrǵyzyldy bıyl. Endi sonyń ári qaraı ósip-ónýi qadaǵalanyp otyrsa. Almatynyń barlyq segiz aýdanynda da jastardyń komúnıtı ortalyqtary iske qosylyp, ul-qyzdarymyzdyń bos ýaqytyn tıimdi paıdalanýyna jaǵdaılar jasalǵany qýantady.Qatty turmystyq qaldyqtar tastaýǵa arnalǵan zamanaýı konteınerler qondyryldy bıyl. Bul da qalanyń kelbetin buzbaı, ásemdigin saqtaýǵa arnalǵan qadam dep oılaımyn.
Bizdiń Áýezov aýdanynda bıyl jańǵyrtý-jańartý, jóndeý jumystary kóp júrgizildi. Ásirese, "Saıran" jasandy kólin zamanaýı úlgide qaıta jasap jatqany qýantady.
Lázzat ÁMİRJANOVA, Alataý aýdanynyń turǵyny: ALMATYMNYŃ BARLYQ JETİSTİGİNE TİLEKSHİMİN
– Almaty irgesindegi oblysta týyp óstim. Ásem qalaǵa bala kúnimizde ata-anamyzben qydyryp keletinbiz. Al qazir turaqty turyp jatqanyma otyz bes jyldan asty. Ádemi jastyq shaǵymyzdyń kýási bolǵan Almaty qazir jyl sanap kórkeıýde.
Buryn biz turyp jatqan Alataý aýdany megapolıstiń shet aýdany bolyp sanalatyn. Bir jyldary "Shetsiz qala" degen joba qabyldanǵany esimde. Sonyń nátıjesinde bizdiń aýdannyń aýmaǵy burynǵydan da úlkeıip, mádenıet oryndary, balalar shyǵarmashylyǵy ortalyǵy ashyldy. Aýlalardyń kórkeıgeni óz aldyna bólek áńgime. Nemerelerimmen jıi qydyramyn. Úıde anam bar. Biz qydyratyn jer kóp.
Bir úıli jan bolǵasyn, aýyrmaı-syrqamaı turmaımyz. Jýyrda ǵana bizdiń Alataý aýdanyndaǵy №23 emhana bazasynan "Úzdik tájirıbe ortalyǵy" ashyldy. Bul – Almaty boıynsha ashylǵan alǵashqy medısınalyq ortalyq. Turǵyndar men dárigerler arasyndaǵy baılanysty nyǵaıtýǵa baǵyttalǵan atalmysh joba halyqaralyq standarttarǵa negizdelgen. Munda halyqqa keshendi medısınalyq, áleýmettik jáne psıhologıalyq kómekter kórsetiledi.
Almatymnyń barlyq jetistigine tilekshimin.