Jýyrda Almaty tehnologıa jáne florıstıka kolejinde Naýryz meıramy men Qazaqstan halqy Assambleıasynyń 30 jyldyǵy qatar atalyp ótildi. Atalǵan kolejde 19 etnostyń ókili bilim alýda.
Atalǵan is-shara barysynda stýdentter ár ulttyń ulttyq kıimin kıip, sol ulttyń ónerin kórsetti. Almaty tehnologıa jáne florıstıka kolejiniń ónerli stýdentteri ásem ánnen shashý shashyp, myń burala bılese, kórshiles «Sán jáne moda dızaın» kolejinen stýdentter arnaıy kelip, kúmbirlegen kúımen keshtiń sánin kirgizdi. Merekege kelgen qonaqtar men ata-analarǵa, stýdentterge tegin kóje taratylyp, ystyq baýyrsaq usynyldy. Osynaý ulyq merekege uıǵyr qyzy Tolýnaı Nızamova da kelgen eken. Áńgimege tarttyq.
– Men de osy keshtiń meımany bolǵanyma qýanyshtymyn. Ultymnyń kıimin kıip keldim. Talaı etnostyń basyn biriktirip otyrǵan osynaý beıbit elde óz tilimizdi de, mádenıetimizdi de umytpaı, bárimiz aýyzbirshilikpen ómir súrip jatqanymyzdyń ózi úlken jetistik.
Qazaq pen uıǵyr halqynyń uqsastyǵy óte kóp. Eń birinshi uqsastyǵymyz – musylmanbyz. Odan keıingi uqsastyǵymyz – biz de úlkenge qurmet, kishige izet kórsetýdi qatty ustanamyz. Salt-dástúrge berikpiz. Kelinniń sálem salýy, balany qyrqynan shyǵarý, uldy súndetke otyrǵyzý, besik toı, shildehana, tusaýkeser salty da uıǵyrlarda bar.
Maǵan qazaqtyń qyzynyń artynan ákeletin qalyńmal dástúri unaıdy jáne óte durys dep esepteımin. Besik jyry, toı jyry unaıdy. «Taspen atqandy aspen at», «Beınet túbi – zeınet» sekildi naqyl sózderińiz maǵynaly.
Biz qazaqtan da, orystan da kelin aldyq. Qandaı ultpen qudalasaq ta, tatý-táttimiz. Eń birinshi orynǵa syılastyqty qoıamyz. Eki qyz, bir ul tárbıelep otyrmyz. Bir nemeremiz bar. Bári qazaqsha biledi. Jumystan tys ýaqytta sportpen aınalysqandy unatamyn, baseınge baramyn, taýǵa shyǵamyn. Án salyp, bı bıleıtin de ónerim bar. Óner de ulttardy bir-birine jaqyndastyrady dep bilemin.
Elimizdegi eń úlken megapolıs – Almatyda turý baqyty buıyrǵanyna qýanyshtymyn. Almaty qalasy Qylmystyq-atqarý júıesi departamentine qarasty №11 mekemede ádilet kapıtanymyn. Áriptesterim túgel qazaq. Ujymda aýyzbirshilik mol. Men sottalǵan jasóspirimderdiń eńbegin uıymdastyrý tobynyń aǵa ınspektorymyn. Balalar kolonıasynda jazasyn ótep jatqan jetkinshekterdiń jumysyn qadaǵalaımyn. Olardy adal eńbekke baýlımyz. Tapqan azyn-aýlaq tabysyn úıine jiberýine, otbasyn qýantýyna dáneker bolamyz. Olardyń da qoǵamǵa kerek ekenin sezindirý, ómirge degen qushtarlyǵyn joǵaltyp almaı, jaqsy kúnderden úmitin úzbeýi úshin qoldaý kórsetip otyramyz. Biz úshin barlyq bala – ortaq. Olar osy jerden aıaǵyn jaza basqan qateligin túsinip, jaqsy azamat bolyp, bizge alǵysyn aıtyp shyǵyp jatsa, biz úshin úlken mártebe sol, – deıdi Almaty qalasy Qylmystyq-atqarý júıesi departamentine qarasty №11 mekeme qyzmetkeri ádilet kapıtany Tolýnaı Nızamova.