Almaty qalasy Belsendi uzaq ómir súrý ortalyǵynyń Medeý aýdandyq bólimshesinde Qazaqstan halqynyń birligi kúni qurmetine «Birlik bar jerde tirlik bar» taqyryby sheńberinde merekelik konsert ótti.
Zeınetkerler mádenı is-sharaǵa ádemi sahnalyq kıimderin kıip, jasanyp, kóterińki kóńil kúıde kelipti. Olar soǵys jyldaryndaǵy patrıottyq ánderdi, dostyq, birlik týraly týyndylardy shyrqady. “Kıev válsi”, “Shaıhana”, “Grýzın áni”, “Bozjorǵa”, “Almaty túni” syndy túrli janrdaǵy ánder de kópshiliktiń yqylasyna bólendi.
Ortalyqtaǵy bı úıirmesine qatysatyn ájeler erkin qımylmen myń burala bılep shyqqanda, tańdanbasqa sharańyz qalmaıdy.
Aıtpaqshy, ortalyqta jıyrmadan astam etnostyń ókilderi bar.
_”Búginde qalanyń barlyq aýdanynda Belsendi uzaq ómir ortalyqtary sátti jumys isteýde. Bul jobanyń maqsaty – uzaq jyldar jumys istep, eńbeginiń zeınetin kóretin jasqa jetip, zeınet demalysyna shyqqan aǵa býynǵa qoldaý kórsetý, olardyń ómir súrý sapasyn arttyratyn zıatkerlik, osyndaı mádenı-rýhanı shyǵarmashylyq, qoǵamdyq is-sharalarǵa keńinen tartý”, - deıdi Almaty qalasy Belsendi uzaq ómir súrý ortalyǵynyń dırektory Sáýle Beketaeva.
Ortalyqqa keletin ata-ájelerge 40-tan astam qyzmet túri kórsetiledi. Dálirek aıtsaq, kóbisi til úırenip, kompúterlik saýattylyqty meńgerýdi. Densaýlyqty dári-dárimeksiz nyǵaıtý boıynsha sabaqtar da suranysqa ıe.
Negizi, egde jastaǵy almatylyqtar arasynda «Aıkýne» ulttyq jattyǵýlary, keskindeme kýrstary, hor, qolóner jáne agroterapıa erekshe tanymal.
Búgingi merekede qolónerden sheberlik sabaǵy ótti.
”Men bul ortalyqta qolónerden sabaq beremin. Úıirmege 25 zeınetker qatysyp júr. Olar shı toqıdy, oıý oıady, jún tútip, urshyq ıirip, tekemet basady, júnnen, akrıl jipterden túrli beıneler, monshaqtardan kádesyılar, áshekeı buıymdar jasaıdy. Kóbisi qolónerge osy ortalyqqa kelgende qyzyǵa bastaǵanyn aıtady. Biz úlken kisilerdiń ár kúniniń maǵynaly ótkenin qalaımyz. Mine, ózderińiz de kýásizder, án salyp, bı bılegen ata-ájeler quddy jasaryp ketkendeı, kóńilderi kóktem. Aǵa býyn qandaı qurmetke de laıyqty, - deıdi Aıjan Anıpına
Merekelik keshti zeınetkerlerden quralǵan “Sandýǵash” toby “Beıbitshilik saqtalady” ánimen túıindedi.