Almaty qalasy Jumyspen qamtý jáne áleýmettik baǵdarlamalar basqarmasynyń Erte aralasý áleýmettik qyzmetter ortalyǵynda art-terapıa sabaǵy ótti. Oǵan osy ortalyqtan tegin qyzmet alyp júrgen balalar ata-anasymen qatysty.
Art-terapıanyń Qazaqstan halqynyń birligi kúnine oraılastyrylǵany da jaıdan-jaı emes. Bul ortalyqqa túrli etnos ókilderi keledi. Bári tatý, bir-birine tilekshi. Sebebi bári de kúnde jetektep júrgen, densaýlyǵynda kináraty bar balasynyń tolyqqandy ómirge aralasyp ketýine janyn salyp júr. Olar kúnde ortalyqqa kelgende bir-birimen shurqyraı amandasyp, hal-jaǵdaı surasyp qaýqyldasyp jatady. Búgingi art-terapıa da balalardy, ata-analardy jáne ortalyq qyzmetkerlerin bir-birine taǵy da jaqyndastyra túskendeı. Baldyrǵandar mamandar kómegimen beıneterapıa men oıyn terapıasyna qatysty. Alaqanmen sýret saldy. Ár balaǵa jeke-jeke kóńil bólindi. Ortalyq qyzmetkerleri kishkentaı dostaryn sabaq kezinde maqtap, madaqtap, kótermelep otyrýdy da umytqan joq.
– Art-terapıa kezinde óz jumysyna rıza bolǵan kishkentaı baldyrǵandarmen birge ózimiz de máz bola qýandyq. Balalar ózin erkin sezindi. Art-terapıalyq sabaqtyń maqsaty da sol – ol jumys ústinde ózin jaıly sezinip, mazasyzdyǵy basylyp, oı-áreketi bir arnaǵa shoǵyrlanyp, ózi sózben jetkize almaıtyn nemese daýystap aıta almaıtyn nársesin boıaý, sýret arqyly bildirip, nátıjesinde óz is-qımylynan qýat alady. Balalarǵa yntymaqtasa istegen toptyq jumys ta unady dep oılaımyn. Art-terapıa olardyń usaq motorıkasyn, shyǵarmashylyq oılaý qabiletin, sóıleýin damytady. Bizdiń kishkentaı dostarymyzǵa jáne ata-analaryna bir sáttik qýanysh syılaı alǵanymyzdyń ózi úlken jetistik, – deıdi Almaty qalasy
Erte aralasý áleýmettik qyzmetter ortalyǵynyń dırektory Nurzıa Aǵabekqyzy.