Tárbıeniń jaqsy quralynyń biri – úlgi-ónege kórsetý.
Ǵaryshkerler kúni qarsańynda Qazaqstannyń tuńǵysh ushqysh-ǵaryshkeri, Keńes Odaǵynyń Batyry, Halyq qaharmany, avıasıa general-maıory Toqtar Áýbákirov «Jas sarbaz» respýblıkalyq áskerı-patrıottyq qozǵalysynyń tárbıelenýshilerimen kezdesti, dep habarlaıdy Almaty-akshamy.kz.
Ulttyq áskerı-patrıottyq ortalyǵynda ótken sharaǵa Áýe qorǵanysy kúshteriniń bas qolbasshysy, avıasıa general-leıtenanty Nurlan Ormanbetov, «Jas sarbaz» qozǵalysynyń tóraǵasy Meıirbek Meńdiǵalıev, elordanyń jastar saıasaty máseleleri basqarmasynyń basshysy Qaırat Qambarov qatysty.
Toqtar Áýbákirov jas patrıottarǵa óziniń ushqysh bolamyn degen bala kúngi armany, maqsatqa qol jetkizý úshin jumsaǵan kúsh-jigeri, ǵarysh kemesimen ushýy jáne jer orbıtasynda bolǵan sátteri jóninde áńgimelep berdi.
«Tárbıeniń jaqsy quralynyń biri – úlgi-ónege kórsetý. Balalar erliktiń, batyldyqtyń jáne eńbektiń arqasynda armanǵa qol jetkizgen adamdy kórdi. Bundaı ónege olardyń esinde qalyp, armanyna aınalady, bolashaǵyna jol silteıdi. Meniń oıymsha, eresekterdiń mindeti – óskeleń urpaqpen jıi kezdesý, olarǵa úlgi-ónege kórsetý, balalardy patrıotızmge baýlý, olarǵa durys joldy tańdaýǵa kómektesý», – dep atap ótti jastarmen kezdesýden keıin qazaqstandyq tuńǵysh ǵaryshker.
Jas patrıottar Toqtar Áýbákirovke jyly lebizderin bildirip, «Jas sarbaz» qozǵalysynyń sımvoly órnektelgen jeıde men bas kıim tartý etti.
