Almaty qalasynda Qazaqstannyń Táýelsizdik merekesine oraı bılárdtan respýblıkalyq týrnırdiń ashylýy ótti. Sharany Almaty qalasy ákimdigi men Ǵ.Músirepov atyndaǵy qoǵamdyq qory uıymdastyrdy. Bul týrnır Qazaqstannyń eńbek sińirgen qaıratkeri, aqyn, "Barys" jáne "Parasat" ordenderiniń ıegeri, sondaı-aq "Frans Kafka" atyndaǵy halyqaralyq syılyqtyń laýreaty Shómishbaı Sarıevtiń qurmetine arnaldy.
Týrnırdi QR Eńbek Eri Asanáli Áshimuly ashyp berdi. Onan soń, "Qazaq ádebıeti" gazetiniń bas redaktory Baýyrjan Jaqyp bastaǵan jazýshylar men qoǵam qaıratkerleri sóz sóıledi. Qonaqtardyń qatarynda Asanáli Áshimov, Beıbit Oraluly, Estaı Álekeev, Súleımen Ibragımov, Qadyrǵalı Kóbentaev syndy tanymal tulǵalar boldy.
Baýyrjan Jaqyp óz sózinde:
– Shómishbaı aǵamyzdyń shyǵarmashylyǵy men ómiri biz úshin úlken mektep. Ol tek aqyn emes, mádenıetke, sportqa jany jaqyn, keń júrekti adam edi. Onyń óleńderi men ánderi áli kúnge deıin halyqtyń júreginen oryn tapqan. Bul týrnır aǵamyzdyń rýhyna degen qurmettiń belgisi, – dep atap ótti.
İs-shara barysynda Ǵ.Músirepov atyndaǵy qoǵamdyq qordyń dırektory Ǵabıden Jákeev Qazaqstannyń halyq jazýshysy Oljas Súleımenovtiń arnaıy quttyqtaý hatyn oqydy. Sonymen qatar, Shómishbaı Sarıevtiń jary arnaıy medalmen marapattaldy. Sharanyń ótýine Atyraýdan kelgen Erlan Tabyldıev pen Sabyrjan Ibragımov sekildi azamattar demeýshilik kórsetti.
Týrnırge 32 qatysýshy baq synasty. Báseke qyzyqty ári tartysty ótti. Jarystyń qorytyndysy boıynsha, "Qazaq ádebıeti" gazetiniń bas redaktory Baýyrjan Jaqyp birinshi oryndy jeńip aldy.
Bul týrnır – aqyn, qoǵam qaıratkeri Shómishbaı Sarıevtiń rýhyna degen qurmet qana emes, sondaı-aq shyǵarmashylyq pen sportty ushtastyrǵan erekshe shara boldy.