Jalpy mýzyka – ǵalymdardyń arasynda eń tartysty máselelerdiń biri.
Óıtkeni mýzykany ashyq haram dep kelgen habarlar sahıh emes, al ol jaıynda kelgen sahıh hadısterde ashyq haram dep aıtylmaǵan.
Hadısterde Paıǵambarymyzdyń (oǵan Allanyń salaýaty men sálemi bolsyn) dýffpen aıtylǵan ánderdi tyńdaǵany, Hassan (r.a.) Alla Elshisin dáriptep, qorǵaǵan ýaqytynda ony quptaǵany t.b. dindi nasıhattaý, halyqty otansúıgishtikke, ımandylyqqa, birlik pen adamgershilikke shaqyratyn ánderge ruqsat ekendigine dálel bolady. Sondaı-aq buǵan birqatar sahabalar, tabıǵınder jáne birneshe ǵalymdar ruqsat bergen.
Imam Ábdý ál-Ǵanı án-Nábýlýsı ál-Hanafı: «Mýzykalyq aspaptar – onyń kórinisi, odan shyǵatyn dybys sebepti haram emes. Óıtkeni qustardyń saıraǵany da áýen. Ǵalymdar qustyń áýeni haram emestigine biraýyzdan kelisken. Eger ol bekershilik, haram nárselermen aralassa sol ýaqytta tyıym salynady», – degen.
Demek dindi nasıhattaıtyn, halyqty otansúıgishtikke, ımandylyqqa, birlik pen adamgershilikke shaqyratyn ánder men mýzykaǵa ruqsat. Eger mýzyka pasyqtyqqa, buzǵynshylyqqa, jamanshylyqqa, azǵyndyqqa, t.s.s. sharıǵatymyzda tyıym salynǵan isterge alyp barsa tyıym salynady.
San ǵasyrdan beri Islam dinin ustanyp kele jatqan qazaq halqynyń ulttyq aspaby – dombyra arqyly án, terme-tolǵaý shyrqap, tyńdaýshyny ımandylyqqa, izgilikke, adamgershilikke, Otandy qorǵaýǵa, ata-anamyzdy qadirleýge shaqyrǵan. Sondyqtan dombyrany tartýǵa bolady.
(QMDB Sharıǵat jáne pátýa bólimi)