Qazirgi ýaqytta Qazaqstannyń sý sharýashylyǵy obektilerindegi jaǵdaı turaqty. Barlyq sý qoımasy shtattyq rejımde jumys istep jatyr. Jaıyq-Kaspıı jáne Tobyl-Torǵaı sý sharýashylyǵy baseınderinde (Qostanaı, Aqtóbe jáne Batys Qazaqstan oblystary) kóktemgi tasqyn kezeńi aıaqtaldy.
9 sáýirden bastap Ertis ózeniniń ekojúıesin saqtaý maqsatynda Shyǵys Qazaqstan oblysyndaǵy Buqtyrma sý qoımasynan ekologıalyq maqsattaǵy sý jiberý jumystary bastaldy. Qazaqstannyń ońtústigindegi sý qoımalaryna sý jınaý jalǵastyrylyp, sýarý kezeńine daıyndyq júrgizilip jatyr.
«Eldi mekenderdi sý basýdyń jekelegen jaǵdaılary negizinen gıdrotehnıkalyq qurylystardyń jumysyna emes, bederdiń jergilikti erekshelikterine jáne egistikterden sýdyń kelýine baılanysty boldy. Jalpy, mınıstrlik qabyldaǵan sharalar táýekelderdi azaıtýǵa jáne sý sharýashylyǵy obektileri arqyly tasqyn sýdyń qaýipsiz ótýin qamtamasyz etýge múmkindik berdi. Bıylǵy sý tasqynynyń ereksheligi – topyraqtyń qatý tereńdiginiń tómen bolýy. Sonyń arqasynda erigen qar sýy jerge jaqsy sińip, jerústi aǵynynyń kólemin azaıtyp, sý tasqyny qaýpin tómendetti. Al byltyr kerisinshe, topyraq tereń qatqandyqtan, erigen sý jerge sińbeı, ústińgi aǵyn kólemi kóp bolǵan», – dedi sý resýrstary jáne ırrıgasıa mınıstri Nurjan Nurjigitov Úkimet otyrysynda.