«Aq jol» fraksıasynyń depýtattary premer-mınıstr Oljas Bektenovqa suraý joldady. Olar Qazaqstan men Qytaı arasyndaǵy keden derekterindegi aıyrmashylyqqa qatysty úkimettiń resmı pozısıasyn bilý jáne kontrabandamen kúresý sharalaryn qabyldaýdy suraıdy, dep habarlaıdy aqshamnews.kz
Suraý Májilis otyrysynda depýtat Erjan Beısenbaev tarapynan kóterildi. Ol ımporttyq taýarlardan túsken QQS búdjetke túsýi mańyzdy ekenin atap ótti.
«Importtyń úlken bóligi Qazaqstanǵa qajetti kedendik rásimderden ótpeı (ekonomıkalyq kontrabanda arqyly) kelip jatyr. Bul ulttyq ekonomıka men búdjetke zıan keltirip otyr. Ashyq kózderde 2024 jyldyń qorytyndysy boıynsha Qazaqstanǵa Qytaıdan ımporttalǵan taýarlardyń keden statısıkasynda rekordtyq aıyrmashylyq anyqtalǵany týraly derekter jarıalandy (13 mıllıard 750 mıllıon dollar kóleminde). Sarapshylardyń baǵalaýy boıynsha, «sur ımport» boıynsha Qazaqstannyń búdjetine QQS boıynsha jetpeıtin qarajat 1,5 mıllıard dollardy, ıaǵnı 850 mıllıard teńgeni quraıdy, bul kedendik alymdardan túspegen qarajatty esepke almaǵanda», — dedi Erjan Beısenbaev.
Sonymen qatar, depýtat vıse-mınıstrdiń saýda jáne ıntegrasıa mınıstrliginiń ókili kóp mıllıardtyq aıyrmashylyqty kedendik esepke alý erekshelikterimen túsindirgenin eske saldy.