Jyl saıyn ótkiziletin oqý-jattyǵýlardyń sapasy men sany artyp keledi
1993 jyly sáýirde 40-shy jalpy áskerı armıa bazasynda qurylǵan Qazaqstannyń Qurlyq áskerleri – Qarýly Kúshterdiń quramy jaǵynan eń kóp ásker túri, dep habarlaıdy Almaty-akshamy.kz.
Bul áskerler agresıany toıtarý úshin jaýyngerlik daıyndyqty saqtaý, eldiń aýmaqtyq tutastyǵy men egemendigin qorǵaý, memlekettik jáne áskerı nysandardy kúzetý mindetterin oryndaıdy.
Qurlyq áskerleriniń quramyna «Ońtústik», «Shyǵys», «Batys» jáne «Astana óńirlik qolbasshylyqtary kiredi. Ózderiniń jaýapkershilik aımaqtarynda olar jaǵdaıdyń turaqtylyǵyn qamtamasyz etip, qarsylastyń kez kelgen qımylyna toıtarys berýge árkez daıyn.
Búginde Qurlyqtaǵy ásker qarý-jaraq pen áskerı tehnıkanyń, joǵary dáldiktegi qarýdyń, baılanys, barlaý jáne avtomattandyrylǵan basqarý júıeleriniń zamanaýı úlgilerimen jabdyqtalǵan.
Qarýly Kúshterdiń bul túrine mamandandyrylǵan kadrlar daıarlaýdy áskerı oqý oryndary júzege asyrady. Ofıserler Almaty qalasyndaǵy Qurlyq áskerleriniń áskerı ınstıtýtynda bilim alyp shyǵady. Kásibı serjanttar bolsa, Aqmola oblysy Shýchınsk qalasyndaǵy áskerı kolejde oqıdy. Gvardeısk garnızonynyń oqý-jattyǵý ortalyǵynda kishi mamandar daıarlanady.
Qurlyq áskerleri qarýly kúres sıpatynyń ózgerýin baǵamdaı otyryp, oqý-jattyǵý prosesin udaıy damytyp otyrady. Máselen, jaýyngerlik daıarlyqqa jeke quramdy daıarlaýdyń jańa ádisteri engizilýde. Qarý-jaraq parki jańartylyp, áskerı ınfraqurylym damýda. Jyl saıyn ótkiziletin oqý-jattyǵýlardyń sapasy men sany artyp keledi.
Qurlyq áskerleri – táýelsiz Qazaqstannyń egemendigi men áskerı qaýipsizdigin qorǵaıtyn Qarýly Kúshterdiń tolyqqandy, utqyrlyǵy joǵary, tehnıkalyq turǵyda jaraqtandyrylǵan ásker túri.