39 myńnan astam adam – bul Ónerkásip jáne qurylys mınıstrligi jetekshilik etetin salalar boıynsha kadrlarǵa degen qajettilik. Bul derekterdi mınıstr Qanat Sharlapaev Úkimet otyrysynda aıtty.
Onyń aıtýynsha, eń úlken tapshylyq qurylys pen sýmen jabdyqtaýda (17 myńnan astam maman qajet), sondaı-aq óńdeý ónerkásibinde (6,8 myń), metalýrgıada jáne taý-ken óndirisinde (4,6 myń) baıqalady.
Atalǵan máseleni sheshý úshin Jańa mamandyqtar atlasyna 75 jańa mamandyq engizildi. Mysaly, robottandyrylǵan taý-ken tehnıkasynyń operatory, vırtýaldy prototıpteý jónindegi maman jáne «Aqyldy úı» jobalaýshysy. Bıznes-prosesterdi avtomattandyrý úderisinde 40-tan astam mamandyq túrlendirildi.
Bıyl ındýstrıalandyrý kartasynyń 190 jobasy sheńberinde mashına jasaýda 8 jańa mamandyq paıda bolady: 3D-basyp shyǵarý jáne dánekerleý jónindegi ınjener, robottandyrylǵan boıaý júıeleriniń operatory jáne basqalary bar. Olar Almaty men Qostanaıdaǵy negizgi óndiristik jobalarda jumys isteıtin bolady.
336 kásipti qamtıtyn segiz salada jasandy ıntellekt tehnologıalaryn qoldana otyryp, 60 kásiptik standarttardy ázirleý jáne ózektendirý boıynsha jumys júrgizilýde.
Ónerkásip salasynda dýaldy oqytýdy paıdalana otyryp, kadr daıarlaý 284 kolejde júrgiziledi, 700-den astam kásiporyn jumyldyrylǵan. Sharttar men memorandýmdar sheńberinde olar 30-dan astam bilim berý baǵdarlamasyn iske asyrýda. Jyl saıyn 13 myńnan astam jas maman turaqty jumyspen qamtamasyz etiledi.
Geolog mamandyǵyn dáripteý maqsatynda «Jas geolog» qoǵamdyq qory quryldy, «Eńbek sińirgen geolog» nagradasy vedimistiktan memlekettik mártebege qaıta aýystyryldy. Qurylys salasynda da jumys júrgizilýde.
2019 jyldan bastap Otbasy banki jumysshylardy qoljetimdi baspanamen qamtamasyz etý jónindegi korporatıvtik baǵdarlamany iske asyrýda. Sońǵy 2 jylda kásiporyndardyń 122 qyzmetkeri páter kiltine ıe boldy. Aýyldan kadrlardyń ketýin azaıtý úshin óz qyzmetkerlerine turǵyn úı salǵan jumys berýshilerdiń shyǵyndary sýbsıdıalanady. Sonymen qatar 400-den astam maman «Qazaqstannyń qurylys salýshylar qaýymdastyǵy» jáne BI University biliktilikti arttyrý kýrstarynan ótti. Ótken jyly WorldSkills Kazakhstan chempıonatynda 108 jeńimpaz elimizdiń jetekshi kompanıalarynan jumysqa ornalasý týraly usynystar aldy.