Energetıka mınıstri Almasadam Sátqalıev Úkimet otyrysynda «Jumysshy mamandyqtary jyly» aıasynda júrgizilip jatqan jumystar týraly baıandady.
Ol búgingi tańda respýblıkanyń otyn-energetıkalyq kesheni sanalatyn 1671 kásiporynda 303 myńnan astam túrli kásip qyzmetkerleri jumys isteıtinin atap ótti.
2030 jylǵa deıin OEK salalarynda qurylys kezeńinde de, turaqty jumys oryndarynda da 83 myńnan astam sapaly jumys oryndaryn qura otyryp, 99 jobany iske asyrý josparlanýda.
Munaı-gaz salasyndaǵy jobalardy iske asyrý munaı-gaz salasynyń da, aralas salalardyń da tehnıkalyq mamandyqtary úshin shamamen 22 myń jumys ornyn ashýǵa múmkindik beredi.
Munaı-gaz hımıasyna 6 iri jobaǵa 21 myńnan astam qyzmetker tartylatyn bolady, onyń ishinde 18 myńy ýaqytsha jáne 3 myńnan astamy turaqty jumys.
Elektr energetıkasynda 72 jobada, onyń ishinde 32 jańartylatyn energetıka jobasynda 41 myńnan astam jumys orny, ýaqytsha 35 myńnan astam jáne turaqty 6 myńǵa jýyq jumys orny ashylady.
«Atom elektr stansasyn salý jobasy boıynsha 2030 jylǵa qaraı 5 myńǵa jýyq adam, al 2032 jyly qurylystyń sharyqtaý kezeńinde 10 myńǵa jýyq adam jumys oryndarymen qamtamasyz etiletin bolady. Paıdalaný kezeńinde joba keminde 2 myń adamdy jumys oryndarymen qamtamasyz etedi. Jańa jobalardan basqa, jumys istep turǵan OEK kásiporyndarynda 2025-2029 jyldar kezeńinde kadrlarǵa jalpy qajettilik qosymsha 16 myńǵa jýyq jumys ornyn quraıdy», — dep tolyqtyrdy Almasadam Sátqalıev.