QR Premer-mınıstri Oljas Bektenovtiń tóraǵalyǵymen ótken Úkimet otyrysynda otandyq farmasevtıkadaǵy kompanıalardy qoldaý sharalary qaraldy. Osy baǵytta júrgizilip jatqan jumystar týraly QR densaýlyq saqtaý mınıstri Aqmaral Álnazarova baıandady, dep habarlaıdy aqshamnews.kz
2024 jyldyń 1 jartyjyldyǵynyń qorytyndysy boıynsha otandyq farmasevtıkalyq ónim óndirý kólemi 95 mlrd teńgege deıin ulǵaıdy, ósim 14,5%-dy qurady. Búgingi tańda 35 qazaqstandyq óndirýshimen 4 myńǵa jýyq farmasevtıkalyq ónim túrin jetkizýge 94 uzaq merzimdi shart jasaldy. Úsh jyl ishinde uzaq merzimdi sharttar sheńberinde tolyq kólemge kezeń-kezeńmen shyǵý josparlanǵan.
«Jyldyń sońyna deıin ózge 24 otandyq óndirýshilermen uzaq merzimdi sharttardyń jasalýy arqyly 1 412 dárilik zattar men medısınalyq buıymdardyń jetkizilýi qarastyrylýda. Dárilik zattardy satyp alý kezinde otandyq óndirýshiler úshin preferensıalar belsendi paıdalanylady. Máselen, osy tetikti paıdalana otyryp, bıylǵy alty aıda 29,5 mlrd teńgege 196 dári-dármek túrleri jetkizildi», — dep atap ótti Aqmaral Álnazarova.
Densaýlyq saqtaý mınıstrligi DDU tizbesi negizinde keń taralǵan aýrýlardy emdeýge arnalǵan basym dárilik zattardyń tizimin jasady. 283 dárilik zat iriktelip alyndy, osy tizimdegi 107 dárilik zattar Qazaqstan aýmaǵynda óndiriledi. Elimizdiń dárilik qaýipsizdiginiń turaqty bazalyq deńgeıin qamtamasyz etý úshin taıaý bolashaqta qalǵan 178 basym dári-dármektiń óndirisin jolǵa qoıý qajet, dep atap ótti mınıstr.