Qazaqstan ekonomıkasy senimdi ósý qarqynyn kórsetip, pandemıaǵa sátti beıimdeldi.
Sarapshylardyń aıtýynsha, búgingi tańda kórsetkish pandemıaǵa deıingi deńgeıge jetti. Bıylǵy 11 aıdyń qorytyndysy boıynsha, JİÓ 3,8% ósti, dep habarlaıdy Almaty-akshamy.kz
Qańtar-qazan aılarynda eldiń syrtqy saýda aınalymy 82 mlrd dollardan asty. Bul kórsetkish 2020 jyldyń sáıkes kezeńimen salystyrǵanda 14% artyq. Sondaı-aq eksport kólemi 49 mlrd dollardan asyp, 23,5% senimdi ósim kórsetti.
«Barlyq sala boıynsha oń dınamıkany baıqap otyrmyz. Óńdeý ónerkásibi, elektrmen, sýmen jabdyqtaý joǵary ósý qarqynyn kórsetip otyr. Sondaı-aq bizde aqparat pen baılanys salasy da aıtarlyqtaı ósim kórsetti. Al saýda qaıta qalpyna kelip, serpindi ósim kórsetýde. Qurylys salasynda da ósim baıqalyp tur», - deıdi QR UEM Makroekonomıkalyq taldaý jáne boljamdaý departamenti basqarmasynyń basshysy Qalybek Maǵzum.
2021 jyly naqty sektordyń ósýi, saýdanyń damýy, joǵary ınvestısıalyq belsendilik Qazaqstan ekonomıkasynyń senimdi damýynyń faktoryna aınaldy. Bıylǵy jyly kapıtal salymdary negizinen qurylys, óńdeý ónerkásibi, aýyl sharýashylyǵy jáne saýda sıaqty salalarǵa baǵyttaldy.
«Investısıalar boıynsha sońǵy 2 aıda ósim oń dınamıka kórsetip otyr. Qazir ósim 2,6% quraıdy. Bul jerde bizdiń óndirýshi emes saladaǵy ınvestısıalardyń ósip kele jatqanyn atap ótý kerek. Jalpy alǵanda taý-ken óndirý salasyn qospaǵanda, ósim 17,1% qurady. Ekonomıkanyń belsendi ósý faktorlarynyń biri osy», - dedi QR UEM Makroekonomıkalyq taldaý jáne boljamdaý departamenti basqarmasynyń basshysy Qalybek Maǵzum.