Kardıologıa jáne ishki aýrýlar ǵylymı-zertteý ınstıtýtynda birden eki aýrýdy - júrek yrǵaǵynyń buzylýlaryn jáne júrektiń kemistigin emdeýge baǵyttalǵan ashyq júrekke krıoablásıa operasıasy jasaldy, dep habarlaıdy Almaty-akshamy.kz
Krıoablásıa búginde tek qana Kardıologıa jáne ishki aýrýlar ǴZI-da jasalady. Operasıa ústelindegi kezekti pasıent - 64 jastaǵy áıel. Ol aldaǵy jańa jylda ádettegi qalypty ómirine orala alady. Tolyqtaı ońaltý bir aıǵa jýyq ýaqytty alady. Jasandy qan aınalym zerthanasy men operasıa blogy bar kardıohırýrgıa bólimshesiniń meńgerýshisi Rústem Tóleýtaevtyń aıtýynsha, krıoablásıa – zamanaýı jáne senimdi tehnologıalardyń biri.
«Júrektiń qaqpaqshalyq kemistiginiń saldarynan kóbine júrek yrǵaǵy buzylady. Búgingi tańda biz júrek yrǵaǵynyń buzylysyn emdeý úshin jańa tehnologıa – krıoablasıany paıdalanamyz. Buǵan deıin jylý energıasyn paıdalansaq, búginde medısınalyq azot pen sýyq energıany paıdalanamyz. Bizde osyndaı operasıalar jasaýdyń tájirıbesi bar jáne olardyń qandaı jaqsy nátıje beretinin kórip otyrmyz, al aralasýdan keıin pasıentte turaqty yrǵaq qalyptasyp, saqtalady», – deıdi dáriger.
Krıoablásıa jasaý úshin kórsetkishterge paroksızmaldy nemese turaqty nysandaǵy bolsyn, júrektiń qaqpaqshaly kemistigi men yrǵaǵynyń buzylýy jatady. Qarsy kórsetkishter joq, tipti tromb bolǵan jaǵdaıda hırýrgtar aralasady da, ony alyp tastaıdy. Sonymen birge, krıoablásıa tromboembolıalyq asqynýlar men ınsýlttardyń aldyn alýǵa kómektesedi. Bul dárigerdiń pikirinshe, ınsýltterdiń shamamen 80%-y júrek yrǵaǵynyń buzylýy sebebinen bolady. Operasıa 4-5 saǵatqa sozylady. Qazaqstandyqtarǵa Medısınalyq saqtandyrý qory esebinen operasıa tegin jasalatynyn aıta ketý kerek.
«Barlyq em-sharalardy biz bir operasıa kezinde jasaımyz, osydan keıin pasıenttiń júrek yrǵaǵy qalpyna kelip, jyldam saýyǵyp, operasıanyń áserin erte sezinedi. Óıtkeni júrek durys jıyryla bastaǵandyqtan, ári qaraı júrek tininde qosymsha qaıtalama ózgerister bolmaıdy», – dep túsindirdi Rústem Tóleýtaev.
Dárigerdiń aıtýynsha, aldyńǵy hırýrgıalyq aralasýlar tıisti nátıjeler bermeı, sodan keıin pasıentke krıoablasıa jasalyp, jaqsy nátıjeler bolǵan. Krıoablasıa pasıentke qaı ádis saı kelýine baılanysty standartty ádis ashyq júrekte de, sonymen qatar az ınvazıvti ádispen de iske asyrylýy múmkin. Bul jaǵdaıda 64 jastaǵy pasıentke laparoskopıamen operasıa jasaý múmkin bolmady deıdi dárigerler. Ońaltý sharasy meılinshe qysqa ýaqytty alady.
«Osylaısha, erte ońaltý kezeńi bir apta ishinde ótedi, al bir aıdan keıin pasıent klınıkaǵa ońaltýdyń ekinshi kezeńine qaıtyp keledi. Oń nátıjesi bir aıdan keıin-aq biline bastaıdy, ıaǵnı naýqastyń ál-aýqaty jaqsaryp jáne dárigerge keletindeı sımptomdary bolmaıdy. Osyǵan kóńil aýdarý qajet. Eger adam entigý, sharshaý, júrektiń aýyrýy men isiný sekildi belgilerdi baıqaıtyn bolsa, saq bolýy tıis», – deıdi dáriger.
Onyń aıtýynsha, sımptomdardyń paıda bolýyn kútýge bolmaıdy, profılaktıka úshin jyl saıynǵy skrınıngten ótý kerek, ol aýyrý paıda bolsa, erte anyqtaýǵa múmkindik beredi. Aýrý qanshalyqty erte anyqtalsa, ony emdeý sonshalyqty jeńil bolady.