Qazaqstan 2024 jyly Ujymdyq qaýipsizdik týraly shart uıymy (UQSHU) men Halyqaralyq Araldy qutqarý qorynda (HAQQ) tóraǵalyq etip, óńirlik qaýipsizdik pen ekologıalyq turaqtylyqty qamtamasyz etý baǵytynda mańyzdy bastamalardy kóterdi, dep habarlaıdy aqshamnews.kz
UQSHU-ǵa tóraǵalyq etý barysynda Qazaqstan transshekaralyq qylmys, terorızm jáne esirtkiniń zańsyz aınalymyna qarsy is-qımylǵa erekshe nazar aýdardy. 80-nen astam is-shara ótkizildi, onyń ishinde memleket basshylarynyń kezdesýleri, taqyryptyq dóńgelek ústelder men áskerı jattyǵýlar uıymdastyryldy. Sonymen qatar, Tájik-aýǵan shekarasyn nyǵaıtý baǵdarlamasy boıynsha 10 jyldyq jumystyń aıaqtalýy mańyzdy kezeń boldy.
HAQQ tóraǵalyǵy (2024-2026) aıasynda Qazaqstan sý-energetıkalyq resýrstardy basqarýdyń tıimdi mehanızmin ázirleýge jáne ekologıalyq baǵdarlamalardyń sapaly iske asyrylýyna basa nazar aýdardy. Sonymen birge klımattyń ózgerýiniń teris saldaryn jeńildetý úshin halyqaralyq yntymaqtastyqty nyǵaıtý jumystary júrgizildi.
Sý dıplomatıasy boıynsha da Qazaqstan úlken jetistikterge qol jetkizdi. 2024 jyly Qytaı, Reseı jáne Ortalyq Azıa elderimen transshekaralyq ózender boıynsha 35-ke jýyq kelissózder ótti. Qyrǵyzstan men Ózbekstanmen Shý, Talas jáne Syrdarıa ózenderi boıynsha sý alý týraly kelisimderge qol jetkizildi. Qytaımen Ertis jáne İle ózenderi boıynsha da kelissózder júrgizilýde. Qazaqstannyń BUU-nyń Halyqaralyq sý aǵyndaryn keme qatynasynan basqa paıdalaný túrleriniń quqyǵy týraly konvensıasyna qosylýy da sý resýrstaryn tıimdi paıdalaný baǵytynda mańyzdy qadam bolyp tabylady.
Qazaqstannyń osy bastamalary óńirlik jáne halyqaralyq deńgeıde ekologıalyq jáne qaýipsizdik máselelerin sheshýde mańyzdy ról atqarady.