Qaraly habar týraly Abaı atyndaǵy Qazaq ulttyq opera jáne balet teatry habarlady.
Qazaqstannyń Halyq artisi, Qurmanǵazy atyndaǵy Qazaq ulttyq konservatorıasynyń profesory, “Qurmet” ordeniniń ıegeri Ǵafız Esimov 78 jasynda dúnıe saldy, dep habarlaıdy aqshamnews.kz
Ǵafız Esimov 1975 jyldan Abaı atyndaǵy Qazaq ulttyq opera jáne balet teatrynyń solısi bolyp qyzmet jasaǵan.
“Ǵafız Esimovtiń qazasyna oraı barsha ónersúıer qaýymǵa, otbasyna teatrdaǵy súıikti shákirtteri, zamandastary, teatr ujymy qaıǵyryp kóńil aıtady” delingen óner ujymynyń habaralamasynda.
Ártis shyǵarmashylyǵynda Abaı (A.Jubanov pen L.Hamıdıdiń «Abaıynda»), Dýman (E.Brýsılovskııdiń «Dýdaraıynda»), Alpamys (E.Rahmadıevtiń «Alpamysynda»), Qurmanǵazy (A.Jubanov pen Ǵ.Jubanovanyń «Qurmanǵazysynda»), Onegın (P.I.Chaıkovskııdiń «Evgenıı Onegıninde»), Jermon (Dj.Verdıdiń «Travıatasynda»), Don Jýan (V.Mosarttyń «Don Jýanynda») jáne kóptegen keıipkerlerdiń rólinde negizgi partıada shyrqaǵan.
Ǵafız Esimovtiń rejıserlik jumystary da kórermen esinde. Qoıýshy-rejısser retinde Bazarbaı Jumanıazovtyń «Mahambet» operasyn, Brýsılovskııdiń «Qyz Jibek» spektaklin qaıtadan jańartyp qoıǵan.