Almatydaǵy №7 Qalalyq klınıkalyq aýrýhanada júrektiń negizgi qan-tamyrlaryndaǵy qan aınalymyn qalpyna keltirýge baǵyttalǵan otalar boıynsha sheberlik klasy ótti.
Intervensıondyq hırýrgterge tájirıbe jınaqtaýǵa múmkindik bergen sharaǵa elimizdiń túpkir-túpkirinen mamandar qatysty, dep habarlaıdy aqshamnews.kz.
№7 QKA baspasóz qyzmetiniń habarlaýynsha, sheberlik saǵatyna Avstrıanyń jetekshi ıntervensıalyq kardıology, koronarlyq kúretamyrlardy emdeýde 15 jyldan astam tájirıbesi bar Aýrel Toma shaqyryldy. Toma qazaqstandyq áriptesterin júrek qan-tamyrlarynyń zaqymdanǵan bólikterindegi qan aınalymyn qalpyna keltirý tehnıkasymen tanystyrdy.
Sheberlik klasy barysynda koronarlyq arterıalardyń zaqymdaný deńgeıi joǵary pasıentterge birlesken 3 ota jasady. Dárigerlerdiń aıtýynsha, qan tamyrlary bitelip, oklúzıaǵa ushyraǵan kezde júrek sozylmaly ıshemıaǵa shaldyǵady. Saldarynan naýqas júrip-turǵan saıyn entigip, júrekke salmaq túsedi, stenokardıa, ıaǵnı júrek tusynda aýyrsyný sezimi paıda bolady.
Búgin jasalǵan otalardyń negizgi maqsaty – koronarlyq arterıalardaǵy qan aınalymyn qalpyna keltirý. Biraq ótkizgishti bitelgen, qabyrǵalaryn kálsı tuzdary basqan kúretamyr arqyly ótkizý ońaı sharýa emes. Sondyqtan mundaı operasıalar mindetti túrde hırýrgıalyq tehnıkalarǵa mashyqtanǵan mamandar men zamanaýı qondyrǵylardy qajet etedi.
«Ota jasalǵan naýqastardyń ekeýi buǵan deıin ınfarkt alyp bizdiń aýrýhanaǵa jedel járdemmen túsken. Tıisti emin alǵannan keıin aýrýhanadan shyǵaryldy. Koronarografıa jasaǵan kezde arterıalarda tromb baryn, basqa kúretamyrlardyń da jappaı sozylmaly oklúzıaǵa ushyraǵanyn anyqtadyq. Osy joly pasıentter josparly túrde aýrýhanaǵa jatqyzylyp, MÁMS sheńberinde ota jasatty. Biz operasıaǵa jaǵdaıy óte aýyr naýqastardy, kúrdeli klınıkalyq jaǵdaılardy iriktep aldyq. Nátıjesi – tamasha. Búǵan Aýrel Toma áriptesimizdiń ózi tań qaldy. Jalpy, aýrýhananyń tolyqqandy jabdyqtalýy bizge osyndaı otalar jasaýǵa múmkindik beredi. Biraq sheberlik klasynda jasalǵan otalardyń orny bólek, biz tamasha tájirıbe jınaqtadyq. Avstrıalyq áriptesimizben túrli klınıkalyq jaǵdaılardy ortaǵa saldyq, biz úshin bul sharanyń paıdasy zor boldy», - deıdi №7 QKA Intervensıondyq hırýrgıa jáne arıtmologıa bólimshesi meńgerýshisi Sáken Anartaev.
Ota barysynda pasıent oıaý bolady. Pýnksıa arqyly tamyrdyń ishine arnaıy kateter ornatylyp, bitelgen arterıalar ótkizgishtiń kómegimen tazartylady. Bul aýyrtatyn prosedýra emes, sondyqtan ota narkozsyz jasalady. Pýnksıa orny ǵana lıdokoın eritindisimen jansyzdandyrylady. Nátıjesinde júrektiń bulshyq etteri tolyqqandy jumys isteı bastaıdy. Naýqastar ózin jeńil sezinip, entigý men júrek tusynyń aýyrǵany basylady.